Літургія гадзінаў

Нядзеля - 1 лістапада 2026
УСІХ СВЯТЫХ
Урачыстасць

ЗАКЛІК

Заклік з’яўляецца пачаткам штодзённай літургічнай малітвы. Ён папярэднічае Гадзіне чытанняў або Ютрані, у залежнасці ад таго, якая з гэтых літургічных гадзінаў распачынае малітву дня.

К. Пане, адкрый мае вусны.
Н. І вусны мае будуць абвяшчаць Тваю хвалу.

Ант. Прыйдзіце, паклонімся Богу, / якога праслаўляе сход святых.

Псальм 24 (23)
Пан уваходзіць у святыню

Брамы нябёсаў адчыніліся для Хрыста дзеля ўзвышэння Яго чалавечай натуры (св. Ірэнэй)

Пану належыць зямля і ўсё, што на ёй, *
сусвет і ўсё, што жыве ў ім.

Бо Ён заснаваў яго на морах *
і на рэках умацаваў яго.

Ант. Прыйдзіце, паклонімся Богу, / якога праслаўляе сход святых.

Хто ўзыдзе на гару Пана, *
і хто стане на святым месцы Ягоным?

Той, у каго рукі бязвінныя і чыстае сэрца, †
хто не схіляў душы да марнасці *
і не прысягаў фальшыва.

Ант. Прыйдзіце, паклонімся Богу, / якога праслаўляе сход святых.

Ён атрымае благаслаўленне ад Пана *
і ўзнагароду – ад Бога, свайго Збаўцы.

Вось пакаленне тых, хто Яго шукае, *
хто шукае аблічча Твайго, Бог Якуба.

Ант. Прыйдзіце, паклонімся Богу, / якога праслаўляе сход святых.

Падыміце вярхі вашыя, брамы, †
узніміцеся, адвечныя вароты, *
каб увайшоў Кароль славы.

Хто ж гэты Кароль славы? †
Пан, моцны і магутны, *
Пан, магутны ў барацьбе.

Ант. Прыйдзіце, паклонімся Богу, / якога праслаўляе сход святых.

Падыміце вярхі вашыя, брамы, †
узніміцеся, адвечныя вароты, *
каб увайшоў Кароль славы.

Хто Ён, гэты Кароль славы? *
Пан Магуццяў, Ён Кароль славы.

Ант. Прыйдзіце, паклонімся Богу, / якога праслаўляе сход святых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Прыйдзіце, паклонімся Богу, / якога праслаўляе сход святых.

ГАДЗІНА ЧЫТАННЯЎ

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

О Хрыстэ ласкавы, які жывеш у небе,
Надзея святых, іх жыццё і збаўленне
Ахвяру хвалы, што сёння прыносім,
Прымі спагадна.

Заўсёды ў небе Цябе праслаўляе
Анёльскі хор незлічонага войска,
Усе святыя галовы схіляюць
Перад Табою, Божа.

Ад гневу свайго захавай нас, Пане,
Стрымай пакаранне дзеля заслугаў
Марыі Панны і святых, што верна
Табе служылі.

Дазволь нам сёння Цябе гімнам славіць,
А пасля смерці няспынна ў нябёсах
Хвалу ўзносіць Найсцяцейшай Тройцы
Сярод збаўлёных. Амэн.

ПСАЛЬМОДЫЯ

1 ант. Якое велічнае імя Тваё па ўсёй зямлі, Пане, * хвалою і пашанаю Ты ўкаранаваў сваіх святых / і адарыў іх уладаю над справай пальцаў Тваіх.

Псальм 8

О Пане, Божа наш, *
якое велічнае імя Тваё па ўсёй зямлі.

Веліч Твая ўзносіцца па-над нябёсамі. *
З вуснаў дзяцей і немаўлят Ты ўчыніў хвалу.

З вуснаў дзяцей і немаўлят Ты ўчыніў хвалу †
насуперак ворагам сваім, *
каб зрабіць нямым непрыяцеля і мсціўцу.

Калі я бачу Твае нябёсы, справу пальцаў Тваіх, *
месяц і зоркі, якія Ты ўмацаваў, думаю,

чым ёсць чалавек, што Ты пра яго памятаеш, *
і сын чалавечы, што Ты ўзгадваеш пра яго?

Ты ўчыніў яго мала меншым ад анёлаў, *
славаю і веліччу ўвянчаў яго.

Паставіў яго валадаром над справай рук Тваіх, *
усё паклаў яму пад ногі.

Авечак і жывёлу ўсялякую, *
і звяроў дзікіх,

птушак нябесных і рыбу марскую, *
і ўсё, што ходзіць сцежкамі марскімі.

Пане, Божа наш, *
якое велічнае імя Тваё па ўсёй зямлі!

2 ант. Шчаслівыя чыстыя сэрцам, * бо яны Бога ўбачаць.

Псальм 15 (14)

Пане, хто можа знаходзіцца ў Тваім шатры, *
хто можа жыць на Тваёй святой гары?

Той, хто паступае беззаганна †
і здзяйсняе справядлівасць, *
і гаворыць праўду ў сэрцы сваім.

Хто языком сваім не абмаўляе. †
Хто не чыніць бліжняму свайму зла, *
не ўзводзіць паклёп на свайго суседа.

Хто з пагардаю глядзіць на злога, *
але хваліць тых, хто баіцца Пана.

Хто, хоць і клянецца сабе на шкоду, *
але захоўвае клятву.

Хто срэбра сваё не дае на ліхвярства *
і не прымае подкупу супраць нявіннага.

Хто так чыніць, *
не пахіснецца ніколі.

2 ант. Шчаслівыя чыстыя сэрцам, * бо яны Бога ўбачаць.

3 ант. Ты паказаў, Пане, * дарогу жыцця сваім святым / і напоўніў іх радасцю перад абліччам сваім.

Псальм 16 (15)

Захавай мяне, Божа, *
бо на Цябе спадзяюся.

Сказаў я Пану: «Ты – мой Пан. *
Няма ў мяне ніякага дабра, апроч Цябе».

Уся мая любоў скіравана да святых, *
выбітных мужоў Яго зямлі.

Тыя, хто ідзе за чужымі багамі, *
памнажаюць свае цярпенні.

Я не буду ліць іхніх крывавых ахвяраў, *
іх імёнаў не вымавяць мае вусны.

Пан – частка спадчыны маёй і келіха майго, *
Ён лёс мой трымае.

Шнуры адмерылі мне шчодры надзел, *
і мая спадчына мне вельмі даспадобы.

Благаслаўляю Пана, які дае мне параду, *
бо і ноччу вучыць мяне маё сэрца.

Пана маю заўсёды перад вачыма, *
Ён праваруч мяне, – і я не пахіснуся.

Таму радуецца маё сэрца і весяліцца душа, *
і цела маё будзе спачываць бяспечна,

бо не пакінеш душы маёй у адхлані *
і не дасі святому Твайму ўбачыць тленне.

Ты дарогу жыцця мне пакажаш, †
паўната радасці перад Табою, *
вечнае шчасце праваруч Цябе.

3 ант. Ты паказаў, Пане, * дарогу жыцця сваім святым / і напоўніў іх радасцю перад абліччам сваім.

К. Гляньце на Пана і прасвятліцеся.

Н. І твары вашыя не спазнаюць сораму.

Першае чытанне

Апакаліпсіс св. Яна апостала 5, 1-14

Адкупіў нас Бог з кожнага роду, і мовы, і племені, і народу

Я, Ян, убачыў у правіцы таго, хто сядзіць на троне, кнігу, запісаную ўнутры і звонку, запячатаную сямю пячаткамі. Я бачыў магутнага анёла, які абвяшчаў гучным голасам: «Хто годны разгарнуць гэтую кнігу і зняць з яе пячаткі?» І ніхто ні на небе, ні на зямлі, ні пад зямлёю не мог разгарнуць гэтую кнігу, ні зазірнуць у яе. І я моцна плакаў, бо не знайшлося годнага, каб адкрыць кнігу і зазірнуць у яе. Тады адзін са старэйшын сказаў мне: «Не плач, вось перамог леў з племені Юды, корань Давіда, каб разгарнуць гэтую кнігу і зняць з яе сем пячатак».

І я ўбачыў, што пасярод трона і чатырох жывых істот, і сярод старэйшын стаяў Баранак, нібы забіты, які меў сем рагоў і сем вачэй, што з’яўляюцца сямю Божымі духамі, спасланымі на ўсю зямлю. Ён прыйшоў і ўзяў кнігу з правіцы таго, хто сядзеў на троне. А калі Ён узяў кнігу, тады чатыры жывыя істоты і дваццаць чатыры старэйшыны ўпалі перад Баранкам; кожны меў гуслі і залатыя чашы, поўныя кадзіла, якое ёсць малітвай святых. Яны спявалі новую песню, кажучы: «Ты годны ўзяць кнігу і зняць з яе пячаткі, бо Ты быў забіты і сваёй крывёю Ты адкупіў нас для Бога з кожнага роду, і мовы, і племені, і народу, і зрабіў нас валадарствам і святарамі для Бога нашага; і мы будзем валадарыць на зямлі».

Я бачыў і чуў голас мноства анёлаў вакол трона і жывых істот, і старэйшын. Колькасць іх была мірыяды мірыяд і тысячы тысяч. Яны казалі гучным голасам: «Забіты Баранак годны прыняць моц, і багацце, і мудрасць, і сілу, і пашану, і хвалу, і благаслаўленне».

І я чуў, як кожнае стварэнне, якое ёсць на небе і на зямлі, пад зямлёю і на моры, і ўсё, што ў іх, казала: «Таму, хто сядзіць на троне, і Баранку — благаслаўленне і пашана, і хвала, і моц на векі вечныя».

А чатыры жывыя істоты казалі: «Амэн». Старэйшыны ж упалі і пакланіліся.

Рэспансорый Ап 11, 17; 1, 4; пар. 11, 18; Пс 145 (144), 10

Н. Дзякуем Табе, Пане Божа ўсемагутны, які ёсць і які быў, і які прыходзіць, * бо Ты запанаваў і прыйшоў час, каб даць узнагароду слугам Тваім і святым.

К. Няхай славяць Цябе, Пане, усе Твае стварэнні, і ўсе святыя Твае благаслаўляюць Цябе. Н. Бо.

Другое чытанне

Казанне св. Бэрнарда, абата

(Sermo 2: Opera omnia, Edit. Cisterc. 5 [1968], 364-368)

Спяшаймася да братоў, якія нас чакаюць

Навошта святым хвала, якую мы ўзносім, навошта ім нашая пашана, і навошта, урэшце, уся гэтая ўрачыстасць? Навошта ім зямная хвала, калі паводле вернага абяцання Сына сам нябесны Айцец адорвае іх хвалою? Навошта ім нашыя спевы? Святыя не патрабуюць нашай пахвалы, і нічога ім не дае нашае пакланенне. На самай справе, калі мы адзначаем іх успамін, то самі маем з гэтага карысць, не яны. Што да мяне, то прызнаюся, што колькі б я не думаў пра святых, адчуваю, як ува мне разгараецца полымя вялікіх жаданняў.

Першае жаданне, якое выклікае або ўмацоўвае ў нас успамін святых, – гэта жаданне быць сярод іх, імкненне заслужыць тое, каб стаць суграмадзянамі і суседзямі благаслаўлёных духаў, гэта надзея далучыцца да сходу патрыярхаў, да супольнасці прарокаў, да шэрагу Апосталаў, да незлічонай колькасці мучанікаў, супольнасці вызнаўцаў, да хору дзеваў, урэшце, з’яднацца і радавацца разам з усімі святымі. «Касцёл першародных» хоча прыняць нас, але нас гэта мала хвалюе; нас прагнуць сустрэць святыя, а мы не звяртаем на гэта ўвагі; чакаюць нас справядлівыя, а мы марудзім. Абудзімся, урэшце, браты, устанем з Хрыстом. Шукайма таго, што ўгары. Да таго, што ў вышынях, будзем імкнуцца. Будзем прагнуць убачыць тых, хто сумуе па нас, будзем спяшацца да тых, хто нас чакае, ахопім духоўным прагненнем тых, хто выглядае нас. Але нам не толькі трэба прагнуць быць разам са святымі, але таксама ўдзельнічаць у іх шчасці. Калі прагнем іх прысутнасці, з найбольшай руплівасцю будзем таксама здабываць супольную з імі хвалу. Такая руплівасць не вядзе да згубы, і імкненне да такой славы не з’яўляецца небяспекай.

Другое жаданне, якое абуджае ў нас успамін святых, – гэта жаданне, каб Хрыстус, нашае жыццё, адкрыўся нам таксама як ім, каб і мы апынуліся з Ім у хвале. Цяпер нашая Галава, Хрыстус, аб’яўляецца нам не такім, які Ён ёсць, але якім стаўся дзеля нас – укаранаваны не хвалой, але цернямі нашых грахоў. Недарэчна, каб той, хто належыць да Галавы, укаранаванай цернем, шукаў лёгкага жыцця, бо пурпур не з’яўляецца для яго знакам хвалы, але ганьбы. Калі прыйдзе Хрыстус, ужо не будуць абвяшчаць Яго смерць. Тады пазнаем, што і мы памерлі, а нашае жыццё будзе схаваным у Хрысце. Галава аб’явіцца ў хвале, а разам з ёй заяснеюць праслаўленыя члены. Тады Хрыстус адновіць нашае прыніжанае цела, прыпадабняючы яго да хвалы Галавы, якой з’яўляецца Ён сам.

Мы бяспечна і старанна ідзём да той хвалы. Але, каб мы прагнулі ды імкнуліся да такога вялікага шчасця, мы павінны прасіць дапамогі святых. Праз іх ласкавае заступніцтва мы атрымаем тое, што пераўзыходзіць нашыя магчымасці.

Рэспансорый Ап 19, 5b. 6b; Пс 33 (32), 1

Н. Хваліце Бога нашага, усе слугі Ягоныя і тыя, хто Яго баіцца, малыя і вялікія, * бо запанаваў Пан Бог наш усемагутны.

К. Радуйцеся ў Пану, справядлівыя, праведным належыць спеў хвалы. Н. Бо.

ГІМН

Цябе, Бога, праслаўляем,
Табе, Пане, хвала вечна.

Неба і зямля спявае
Табе, Ойча векавечны.

Табе, Божа, ўсе анёлы,
3 імі Моцы і Нябёсы,

Херубімы, cерафімы
Гімн хвалы адвечны ўзносяць.

Святы, Святы над святымі
Бог магутны і ласкавы,

Над зямлёй і небам слыне
Неабсяжнасць Тваёй славы.

I Апосталы, і вучні,
Хор прарокаў, поўны хвалы,

3 імі мучанікаў лучнасць
Аддаюць Табе пашану.

У сугучным хоры льецца
Па усёй зямлі наўкола

Табе хвала з нашых сэрцаў,
Спеў святы Твайго Касцёла.

Сына з Духам суцяшэння,
Велічы Айца прамністай

Праслаўляе ўсё стварэнне, –
Валадар хвалы Ты, Хрыстэ.

Каб жа выбавіць свет цэлы
Праз свае святыя раны,

Сын Айца спрадвечны, цела
Ты прыняў ва ўлонні Панны.

Зруйнаваў Ты брамы смерці,
На крыжы ёй вырваў джала,

Каб для ўсіх, хто ў Цябе верыць,
Радасць вечная заззяла.

Праваруч Айца, у славе
Трон Твой, Збаўца наш адзіны,

Прыйдзеш зноў адтуль у яве,
Каб судзіць людскія чыны.

Грэшным Ты не дай загінуць, –
Будзь нам Збаўцам, не Суддзёю

I абмый нас ад правінаў
Дарагой сваёй крывёю.

Са святымі, ў бляску моцы
Захавай Тваіх абраных,

Пане, збаў народ Твой, просім,
Благаслаў Тваіх падданых.

Гэтую апошнюю частку гімна можна па жаданні прапусціць.

Шляхам нас вядзі бяспечным
У нябесны Ерузалем.

Цябе, Валадар адвечны,
Мы штодзённа праслаўляем.

Праз вякі гучыць няспынна
Спеў, што славіць Твае справы.

Пане, ад усіх правінаў
Захаваць нас будзь ласкавы.

Не пакінь жа свайго люду,
Божа, без Тваёй апекі.

Пану веру, дык не буду
Асаромлены навекі.

МАЛІТВА

Усемагутны вечны Божа, мы з радасцю праслаўляем заслугі ўсіх святых Тваіх у сённяшняй урачыстасці, просім Цябе, каб малітвы такой вялікай колькасці заступнікаў прынеслі нам Тваё прабачэнне і ласку. Праз Пана нашага.

Потым, прынамсі пры супольнай цэлебрацыі, дадаецца акламацыя:

К. Благаславім Пана.
Н. Дзякуем Пану Богу.

ЮТРАНЬ

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

Езу, Адкупіцель свету,
Будзь для верных дапамогай,
Хай Твая Святая Маці
Грэшным стане ўспамогай.

Хор анёлаў, поўны славы,
Патрыярхаў сход магутны,
Войска слаўнае прарокаў
Будзе нашаю зарукай.

Папярэднік Твой Хрысціцель,
Ключнік неба знакаміты,
Праз Апослаў паслугу
Хай развяжуць путы грэху.

Усе пакутнікі святыя,
Святары, вызнаўцы Пана,
Дзевы, слаўныя ў цноце,
З бруду грэху нас абмыйце.

Хай законнікаў малітвы
Разам з жыхарамі неба
Шлях да вечнасці пакажуць,
Каб маглі мы ўбачыць Бога.

Хай Хрысту хвала ўзнясецца,
І Айцу ў адзінстве з Духам
За святых, якія ў небе,
У шчасці прабываюць вечным. Амэн.

ПСАЛЬМОДЫЯ

1 ант. Жыллё святых у Нябесным Валадарстве, * і ў вечнасці іхні адпачынак, / аллелюя.

Псальм 63 (62), 2-9
Душа, якая прагне Бога

Той з Богам, хто адкідае ўчынкі цемры

Божа, мой Божа, Цябе шукаю, *
Цябе прагне душа мая.

Маё цела па Табе тужыць *
у зямлі пустыннай, засохлай і бязводнай.

Так, у святыні я ўглядаюся ў Цябе, *
каб убачыць Тваю сілу і славу.

Бо міласэрнасць Твая лепшая за жыццё, *
вусны мае будуць хваліць Цябе.

Так, буду благаслаўляць Цябе ў маім жыцці *
і ўзнясу рукі ў імя Тваё.

Душа мая насычаецца, нібы тлушчам і тукам, *
і вусны мае славяць Цябе радасным спевам;

калі ўзгадваю Цябе на маім ложы, *
разважаю пра Цябе ў начную варту.

Бо Ты стаў маёй дапамогай, *
у цені крылаў Тваіх узрадуюся.

Да Цябе імкнецца душа мая, *
трымае мяне Твая правіца.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Жыллё святых у Нябесным Валадарстве, * і ў вечнасці іхні адпачынак, / аллелюя.

2 ант. Святыя Пана, * праслаўляйце Пана навекі.

Песня (Дан 3, 57-88. 56)
Кожнае стварэнне хваліць Пана

Хваліце Бога нашага, усе Ягоныя слугі (Ап 19, 5)

Благаслаўляйце Пана, усе стварэнні Ягоныя, *
хваліце і ўзвялічвайце Яго навекі.

Нябёсы, благаслаўляйце Пана, *
благаслаўляйце Пана, анёлы Ягоныя.

Благаслаўляйце Пана, усе воды, што пад небам, *
няхай усялякая моц благаслаўляе Пана.

Благаслаўляйце Пана, сонца і месяц, *
благаслаўляйце Пана, нябесныя зоркі.

Благаслаўляйце Пана, усе дажджы і росы, *
благаслаўляйце Пана, усе вятры.

Благаслаўляйце Пана, агонь і спёка, *
благаслаўляйце Пана, холад і гарачыня.

Благаслаўляйце Пана, росы ды іней, *
благаслаўляйце Пана, мароз і холад.

Благаслаўляйце Пана, лёд і снег, *
благаслаўляйце Пана, дні і ночы.

Благаслаўляйце Пана, святло і цемра, *
благаслаўляйце Пана, маланкі і хмары.

Няхай зямля благаслаўляе Пана, *
няхай хваліць Яго і ўзвялічвае навекі.

Благаслаўляйце Пана, горы і ўзгоркі, *
благаслаўляйце Пана, усе расліны зямлі.

Благаслаўляйце Пана, крыніцы, *
благаслаўляйце Пана, моры і рэкі.

Благаслаўляйце Пана, кіты і ўсё, што плавае ў водах, *
благаслаўляйце Пана, усе нябесныя птушкі.

Благаслаўляйце Пана, усе звяры і жывёлы, *
благаслаўляйце Пана, чалавечыя сыны.

Няхай Ізраэль благаслаўляе Пана, *
хваліць і ўзвялічвае Яго навекі.

Благаслаўляйце Пана, святары Ягоныя, *
благаслаўляйце Пана, слугі Ягоныя.

Благаслаўляйце Пана, духі і душы справядлівых, *
благаслаўляйце Пана, святыя і пакорныя сэрцам.

Благаслаўляйце Пана, Ананія, Азарыя, Місаэль, *
хваліце і ўзвялічвайце Яго навекі.

Благаславім Айца і Сына, і Духа Святога, *
будзем хваліць і ўзвялічваць Яго навекі.

Благаслаўлёны Ты на скляпенні неба, *
годны хвалы і ўзвялічаны навекі.

2 ант. Святыя Пана, * праслаўляйце Пана навекі.

3 ант. Спявайце гімны ўсім Яго святым, * сынам Ізраэля, народу, які блізка да Яго; / хвала ўсім Яго святым.

Псальм 149
Радасць святых

Дзеці Касцёла, дзеці новага народу радуюцца свайму Валадару – Хрысту (Хезыхій)

Спявайце Пану новую песню, *
хвала Яму на сходзе святых.

Няхай радуецца Ізраэль у тым, хто яго стварыў, *
сыны Сіёна няхай цешацца ў сваім Валадары.

Няхай праслаўляюць імя Ягонае ў танцы, *
няхай зайграюць Яму на бубне і арфе.

Бо Пан любіць свой народ, *
пакорных карануе збаўленнем.

Няхай усклікаюць святыя ў славе, *
няхай радуюцца на ложах сваіх.

Пахвала Богу на іх вуснах, *
а двухбаковы меч – у іхніх руках,

каб адпомсціць язычнікам *
і пакараць народы;

каб звязаць ланцугамі іх каралёў, *
а вяльможаў іх скаваць у жалезныя кайданы,

каб здзейсніць над імі запісаны прысуд: *
такая хвала для ўсіх Ягоных святых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Спявайце гімны ўсім Яго святым, * сынам Ізраэля, народу, які блізка да Яго; / хвала ўсім Яго святым.

Кароткае чытанне Эф 1, 17-18

Бог Пана нашага Езуса Хрыста, Айцец славы, даў вам Духа мудрасці і адкрыцця ў пазнанні Яго і прасвятліў вочы сэрца вашага, каб вы ведалі, у чым надзея паклікання Ягонага, якое багацце слаўнай спадчыны Ягонай для святых.

Кароткі рэспансорый

К. Весяліцеся ў Пану * і радуйцеся, справядлівыя.
Н. Весяліцеся.
К. Усклікайце радасна, усе праведныя сэрцам.
Н. І радуйцеся.
К. Хвала Айцу.
Н. Весяліцеся.

ПЕСНЯ З ЕВАНГЕЛЛЯ

Ант. да песні Захарыі: Праведнікі заззяюць, як сонца, * у Валадарстве іх Айца, / аллелюя.

Песня Захарыі (Лк 1, 68-79)
Месія і Яго папярэднік

Благаслаўлёны Пан, Бог Ізраэля, *
бо наведаў і адкупіў народ свой,

і ўзняў моц збаўлення для нас *
у доме Давіда, слугі свайго.

Як абвясціў спрадвеку *
вуснамі сваіх святых прарокаў,

што збавіць нас ад ворагаў нашых *
і ад рук усіх, хто нас ненавідзіць.

Каб праявіць міласэрнасць да айцоў нашых *
і нагадаць пра святы запавет свой.

Прысягу, якую даў Абрагаму, айцу нашаму, *
дасць нам.

Каб, выбаўленыя з рук ворагаў, *
мы без страху служылі Яму

ў святасці і справядлівасці перад Ім *
ва ўсе дні нашыя.

А ты, дзіцятка, прарокам Найвышэйшага будзеш названа, *
бо пойдзеш прад абліччам Пана падрыхтаваць шляхі Яму,

каб даць народу Ягонаму пазнаць збаўленне *
праз адпушчэнне яго грахоў,

дзякуючы сардэчнай міласэрнасці нашага Бога,*
у якой наведаў нас Усход з вышыні;

каб асвятліць тых, *
хто сядзіць у цемры і ў цені смяротным;

каб накіраваць ногі нашыя *
на шлях спакою.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Захарыі: Праведнікі заззяюць, як сонца, * у Валадарстве іх Айца, / аллелюя.

ПРОСЬБЫ

Бога, карону ўсіх святых, з радасцю просім:

Праз заступніцтва святых збаў нас, Пане.

Божа, крыніца святасці, Ты ў сваіх святых аб’явіў шматлікія цуды сваёй ласкі,

– учыні, каб мы праслаўлялі ў іх Тваю веліч.

Усемагутны, вечны Божа, Ты паказаў нам у святых адлюстраванне святасці Твайго Сына,

– учыні, каб мы пры іх дапамозе дасягнулі з’яднання ў Хрысце.

Валадару неба, Ты праз верных, якія наследавалі Хрыста, абуджаеш у нас жаданне нябеснай айчыны,

– учыні, каб мы дзякуючы ім пазналі дарогу, якая туды вядзе.

Божа, Ты праз эўхарыстычную ахвяру свайго Сына яшчэ больш яднаеш нас з жыхарамі неба,

– дазволь, каб па прыкладу святых, якіх мы ўшаноўваем, мы вытрывала імкнуліся да святасці.

Ойча наш.

МАЛІТВА

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

Малітва перад поўднем

ГІМН

Цяпер мы заклікаем Духа,
Адзінага з Айцом і Сынам:
Прыйдзі і жыватворнай ласкай
Напоўні шчодра нашы сэрцы.

Пачуцці, вусны, розум, воля
Няхай абвесцяць Тваю славу.
Любоў няхай агнём палае,
А жар яе – абудзіць бліжніх.

Дай праз Цябе пазнаць Айца нам
І Сына, што з Яго паходзіць,
Каб шчырай верай вызнавалі,
Што Ты адзіны ў Святой Тройцы. Амэн.

ПСАЛЬМОДЫЯ

Ант. Пан суцешыць Сіён; * будзе ў ім радасць і весялосць, / хвалебная песня і гучанне музыкі.

Псальм 120 (119)
Туга па спакоі

Ва ўціску будзьце цярплівыя, у малітве – трывалыя (Рым 12, 12)

Да Пана ўсклікаў я ў сваёй нядолі, *
і Ён пачуў мяне.

Пане, уратуй маё жыццё †
ад ілжывых вуснаў, *
ад падступнага языка.

Што дасць табе і што дадасць табе *
падступны язык?

Вострыя стрэлы ваяра, *
з ядлоўцу гарачыя вуглі.

Гора мне, што я знаходжуся ў Мэшэх, *
што жыву ў шатрах Кедара!

Занадта доўга мая душа была з тымі, *
хто ненавідзіць спакой.

Я – міралюбны, *
а толькі прамоўлю, яны – за вайну.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пан суцешыць Сіён; * будзе ў ім радасць і весялосць, / хвалебная песня і гучанне музыкі.

Псальм 121 (120)
Вартаўнік народу

Яны ўжо не будуць ні галадаць, ні прагнуць, і не будзе паліць іх сонца і ніякая спёка (Ап 7, 16)

Падымаю вочы свае да вышыняў: *
адкуль прыйдзе мая дапамога?

Дапамога мая ад Пана, *
які стварыў неба і зямлю.

Ён не дасць пахіснуцца назе тваёй, *
не задрэмле той, хто цябе сцеражэ.

Не дрэмле і не спіць *
той, хто сцеражэ Ізраэль.

Пан сцеражэ цябе, *
Пан – твой цень, Ён праваруч цябе.

Удзень сонца не ўдарыць цябе, *
ні месяц ноччу.

Пан захавае цябе ад усякага зла, *
будзе берагчы душу тваю.

Пан будзе сцерагчы выйсце тваё і вяртанне *
цяпер і навекі.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 122 (121)
Святы горад Ерузалем

Вы ж прыступіліся да гары Сіён і да горада Бога жывога, да нябеснага Ерузалема (Гбр 12, 22)

Узрадаваўся я, калі мне сказалі: *
«Пойдзем у дом Пана».

Вось стаяць нашыя ногі *
ў брамах тваіх, Ерузалем.

Ерузалем пабудаваны як горад, *
дзе ўсё злучана ў адно.

Туды ўзыходзяць пакаленні, пакаленні Пана, *
каб, паводле сведчання Ізраэля, праслаўляць імя Пана.

Там стаяць судовыя троны, *
троны дома Давіда.

Прасіце спакою для Ерузалема: *
«Няхай спакой маюць тыя, хто любіць Цябе.

Няхай будзе спакой у мурах Тваіх, *
дабрабыт у палацах Тваіх!»

Дзеля братоў маіх і бліжніх маіх *
скажу я: «Спакой табе!».

Дзеля дома Пана, Бога нашага, *
буду жадаць дабра табе.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пан суцешыць Сіён; * будзе ў ім радасць і весялосць, / хвалебная песня і гучанне музыкі.

Кароткае чытанне Іс 65, 18-19

Радуйцеся і цешцеся вечна з таго, што Я ствару, бо Я зраблю Ерузалем радасцю, а яго народ – весялосцю. І буду радавацца Ерузалему і цешыцца сваім народам. Больш не будзе ў ім чутны голас плачу і голас енку.

К. Радуйцеся і весяліцеся, усе святыя.

Н. Бо вялікая вашая ўзнагарода ў небе.

МАЛІТВА

К. Благаславім Пана.
Н. Дзякуем Пану Богу.

Малітва апоўдні

ГІМН

Божа, Валадар магутны,
Ты кіруеш зменай часу:
Раніцай даеш заранку
І апоўдні ззянне сонца.

Пагасі агонь нязгоды,
Астудзі спякоту гневу,
Прынясі здароўе целу
І спакой праўдзівы ў сэрцы.

Дай нам гэта, добры Ойча,
У адзінстве з Тваім Сынам,
Разам з Духам Суцяшэння,
Бо Ты валадарыш вечна. Амэн.

ПСАЛЬМОДЫЯ

Ант. Народ апавядае пра мудрасць святых, * а ўвесь Касцёл абвяшчае іх хвалу.

Псальм 123 (122)
Надзея народу – у Пану

Двое сляпых... пачалі крычаць: «Змілуйся над намі, Пане, Сыне Давіда» (Мц 20, 30)

Да Цябе ўзнімаю свае вочы, *
які жывеш у нябёсах.

Так як вочы слугаў звернуты *
на рукі іх гаспадароў,

як вочы служанкі – *
на рукі яе гаспадыні,

так нашыя вочы – да Пана, Бога нашага, *
пакуль Ён не змілуецца над намі.

Змілуйся над намі, змілуйся, о Пане, *
бо мы ўжо ўдосталь сытыя пагардай.

Душа наша насычана досыць *
здзекамі дзёрзкіх і пагардай ганарлівых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Народ апавядае пра мудрасць святых, * а ўвесь Касцёл абвяшчае іх хвалу.

Псальм 124 (123)
Дапамога наша – у імені Пана

Пан сказаў Паўлу: «Не бойся, таму што Я з табою» (Дз 18, 9-10)

Калі б Пан не быў з намі, – скажы, Ізраэль, – †
калі б Пан не быў з намі *
і людзі супраць нас паўсталі,

то яны праглынулі б нас жывымі, *
калі б распаліўся іх гнеў супраць нас.

Тады б залілі нас воды, †
паток прайшоў бы над намі, *
тады прайшлі б над намі бурлівыя воды.

Благаслаўлёны Пан, *
які не аддаў нас як здабычу для зубоў іхніх.

Душа наша, як птушка, *
вызвалілася з сіла лоўчых;

сіло парвана, і мы ўратаваліся. †
Дапамога наша – у імені Пана, *
які стварыў неба і зямлю.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 125 (124)
Пан – Вартаўнік свайго народу

Спакой над Ізраэлем Божым (Гал 6, 16)

Тыя, хто спадзяецца на Пана, – як гара Сіён, *
якая не пахіснецца і будзе трываць навекі.

Як горы атачаюць Ерузалем, †
так Пан атачае свой народ *
адгэтуль і навекі.

Бо жазло беззаконных не будзе трываць *
над лёсам справядлівых,

каб справядлівыя не працягвалі *
рук сваіх да беззаконня.

Спрыяй, Пане, добрым *
і праведным сэрцам.

А тых, хто сыходзіць на крывыя шляхі, †
няхай Пан адвядзе разам са злачынцамі. *
Спакой Ізраэлю!

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Народ апавядае пра мудрасць святых, * а ўвесь Касцёл абвяшчае іх хвалу.

Кароткае чытанне 1 П 1, 15-16

На ўзор Святога, які паклікаў вас, самі станьце святымі ва ўсіх паводзінах вашых. Бо напісана: «Будзьце святымі, таму што Я святы».

К. Радуйцеся, справядлівыя, у Пану.

Н. І дзякуйце на ўспамін Ягонай святасці.

МАЛІТВА

К. Благаславім Пана.
Н. Дзякуем Пану Богу.

Малітва пасля поўдня

ГІМН

Божа моцны, усё стварэнне
У Тваіх руках трывае.
Дзённага святла гадзінаў
Ты парадак вызначаеш.

Вечар наш напоўні ззяннем,
Каб святло жыцця не згасла,
І пасля зямной вандроўкі
Мы прыйшлі да вечнай славы.

Дай нам гэта, добры Ойча,
У адзінстве з Тваім Сынам,
Разам з Духам Суцяшэння,
Ты, што валадарыш вечна. Амэн.

ПСАЛЬМОДЫЯ

Ант. Святыя вераю перамагалі валадарствы, * здзяйснялі справядлівасць, / атрымлівалі абяцанні.

Псальм 126 (125)
Радасць і надзея ў Богу

Вы супольнікі нашыя як у цярпеннях, так і ў суцяшэнні (2 Кар 1, 7)

Калі Пан перамяніў лёс Сіёна, *
мы былі, быццам у сне.

Вусны нашыя тады былі поўныя смеху, *

а язык спяваў з радасці.

Тады гаварылі між народамі: *
«Вялікія рэчы ўчыніў Пан для іх».

Вялікія рэчы ўчыніў Пан для нас, *
і мы ўзрадаваліся.

Змяні наш лёс, о Пане, *
як патокі на поўдзень.

Хто ў слязах сеяў, *
жаць будзе з радасцю.

Хто ідзе і плача, несучы насенне, каб сеяць, *
вернецца з радасцю, несучы снапы свае.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Святыя вераю перамагалі валадарствы, * здзяйснялі справядлівасць, / атрымлівалі абяцанні.

Псальм 127 (126)
Праца марная без Бога

Вы – будоўля Божая (1 Кар 3, 9)

Калі Пан не будуе дом, *
то будаўнікі працуюць дарэмна.

Калі Пан не пільнуе горад, *
то вартаўнікі дарэмна чуваюць.

Дарэмна, што вы рана ўстаеце, *
позна кладзецеся і хлеб ясце гаротны,

бо свайму ўмілаванаму *
Ён дае гэта, калі той спіць.

Вось нашчадкі – спадчына ад Пана, *
а плод улоння – узнагарода.

Быццам стрэлы ў руцэ асілка, *
так сыны маладыя.

Шчаслівы той чалавек, *
які напоўніў імі свой калчан,

ён не будзе саромецца, *
калі будуць яны размаўляць з ворагам у браме.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 128 (127)
Божае благаслаўленне дому

«Няхай благаславіць цябе Пан з Сіёна», гэта значыць з Касцёла свайго (Арнобій)

Шчаслівы кожны, хто баіцца Пана, *
хто ходзіць Ягонымі шляхамі.

Плён працы рук сваіх будзеш спажываць, *
будзеш шчаслівы і добра табе будзе.

Жонка твая, як урадлівая вінаградная лаза *
ў сценах дому твайго.

Сыны твае, як аліўкавыя парасткі, *
вакол стала твайго.

Вось так будзе благаслаўлёны чалавек, *
які баіцца Пана.

Няхай благаславіць цябе Пан з Сіёна, – †
і ты ўбачыш дабрабыт Ерузалема *
ва ўсе дні жыцця свайго.

Убачыш патомства сыноў сваіх. *
Спакой над Ізраэлем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Святыя вераю перамагалі валадарствы, * здзяйснялі справядлівасць, / атрымлівалі абяцанні.

Кароткае чытанне Ап 2 1, 10-11а; 22, 3b-4

Анёл узнёс мяне ў духу на вялікую, высокую гару і паказаў мне святы горад Ерузалем, які сыходзіў з неба ад Бога і меў Божую славу. А трон Бога і Баранка будзе ў ім, і слугі Ягоныя будуць служыць Яму. Убачаць Ягонае аблічча, а Ягонае імя будзе на іх чолах.

К. Справядлівыя будуць праслаўляць Тваё імя, Пане.

Н. А праведнікі паселяцца перад Тваім абліччам.

МАЛІТВА

К. Благаславім Пана.
Н. Дзякуем Пану Богу.

ІІ нешпары

ГІМН

О Хрыстэ, наш Адкупіцель,
Абарані сваіх слугаў,
Пачуй малітвы і просьбы
Благаслаўлёнай Марыі.

Нябесныя войскі духаў,
Сваёю магутнаю сілай
Знішчайце ўсё зло ў свеце,
Руйнуйце ліхія задумы.

Прарокі спрадвечнага Бога,
Апосталы Пана і Збаўцы,
За нас у малітвах прасіце,
Каб мы былі разам з вамі.

Пакутнікі слаўныя неба,
Вызнаўцы адважныя веры,
Заступніцтва вашага просім,
Каб мы не жылі без надзеі.

Святыя жанчыны і панны,
Манахі і выхаваўцы,
Вучыце нас жыць для Бога,
Каб трапіць у Яго валадарства.

Няхай галасы нашы разам
Сальюцца ў праслаўленні
У гонар Адзінага Бога
У Тройцы Святой назаўсёды. Амэн.

ПСАЛЬМОДЫЯ

1 ант. Я ўбачыў вялікі натоўп, * якога ніхто не мог палічыць, / з усіх народаў, якія стаялі перад тронам.

Псальм 110 (109), 1-5. 7

Пан сказаў майму Пану: *
«Сядай праваруч Мяне,

пакуль не пакладу ворагаў Тваіх *
да падножжа Твайго».

Жазло сілы Тваёй *
спашле Пан з Сіёна;

будзеш валадарыць *
сярод ворагаў Тваіх.

З Табою панаванне ў дзень Тваёй моцы, †
у бляску святасці, *
з улоння перад світаннем нарадзіў Цябе.

Пан прысягнуў і не пашкадуе: *
«Ты святар навекі на ўзор Мэльхізэдэка».

Пан праваруч Цябе, *
разаб’е каралёў у дзень гневу свайго.

Па дарозе нап’ецца з патоку, *
таму падыме галаву.

1 ант. Я ўбачыў вялікі натоўп, * якога ніхто не мог палічыць, / з усіх народаў, якія стаялі перад тронам.

2 ант. Бог выпрабаваў іх * і прызнаў годнымі сябе, / таму яны атрымаюць / цудоўнае валадарства з рук Пана.

Псальм 116, 10-19 (115)

Я верыў нават тады, калі казаў: *
«Я моцна прыгнечаны».

Я сказаў у боязі сваёй: *
«Кожны чалавек – ілгун».

Чым аддзячу я Пану *
за ўсе Яго дабрадзействы для мяне?

Келіх збаўлення ўзніму *
і буду заклікаць імя Пана.

Выканаю свае абяцанні для Пана *
перад усім Яго народам.

Каштоўная ў вачах Пана *
смерць Яго святых.

Пане, я Твой слуга, †
Я слуга Твой, сын слугі Тваёй, *
Ты разарваў мае кайданы.

Я прынясу Табе ахвяру хвалы *
і буду заклікаць імя Пана.

Выканаю свае абяцанні для Пана *
перад усім Яго народам.

У дварах дома Пана, *
сярод цябе, Ерузалем.

2 ант. Бог выпрабаваў іх * і прызнаў годнымі сябе, / таму яны атрымаюць / цудоўнае валадарства з рук Пана.

3 ант. Сваёй крывёю Ты адкупіў нас, Пане Божа, * з кожнага роду, і мовы, і племені, і народу, / і зрабіў нас валадарствам для Бога нашага.

Песня Ап 4, 11; 5, 9. 10. 12

Ты, Пане і наш Божа, *
годны прыняць славу і пашану, і сілу,

бо Ты стварыў усё, *
і з Тваёй волі існавала і было створана.

Ты годны ўзяць кнігу *
і зняць з яе пячаткі,

бо Ты быў забіты †
і сваёй крывёю Ты адкупіў нас для Бога *
з кожнага роду, і мовы, і племені, і народу,

і зрабіў нас валадарствам і святарамі для Бога нашага, *
і мы будзем валадарыць на зямлі.

Забіты Баранак †
годны прыняць моц, і багацце, і мудрасць, *
і сілу, і пашану, і хвалу, і благаслаўленне.

Кароткае чытанне 2 Кар 6, 16b; 7, 1

Вы – святыня жывога Бога, як сказаў Бог: «Пасялюся ў іх і буду хадзіць, і буду іх Богам, а яны будуць Маім народам». Таму, умілаваныя, маючы абяцанні, ачысцім сябе ад усякага бруду цела і духа, здзяйсняючы асвячэнне ў боязі Божай.

Кароткі рэспансорый
К. Святыя і справядлівыя, * радуйцеся ў Пану.
Н. Святыя.
К. Вас выбраў Бог як сваю спадчыну.
Н. Радуйцеся.
К. Хвала Айцу.
Н. Святыя.

ПЕСНЯ З ЕВАНГЕЛЛЯ

Ант. да песні Марыі: О, якое цудоўнае валадарства, * у якім усе святыя радуюцца разам з Хрыстом; / апранутыя ў белыя шаты, / яны ідуць следам за Баранкам, куды б Ён ні пайшоў.

Песня Марыі (Лк 1, 46-55)
Радасць душы ў Пану

Велічае душа мая Пана, *
і ўзрадаваўся дух мой у Богу, маім Збаўцу,

бо глянуў Бог на пакору сваёй слугі. *
І цяпер благаслаўляць мяне будуць усе пакаленні.

Бо вялікае ўчыніў мне Усемагутны, *
а імя Яго святое.

І міласэрнасць Яго з пакалення ў пакаленне *
над тымі, хто Яго баіцца.

Паказаў моц сваёй правіцы, *
рассеяў тых, хто пыхлівы сэрцам.

Скінуў магутных з трону *
і ўзвысіў пакорных.

Дабром галодных насыціў, *
а багатых ні з чым адправіў.

Прыняў свайго слугу Ізраэля, *
памятаючы пра сваю міласэрнасць,

як абяцаў бацькам нашым - *
Абрагаму і яго патомству навекі.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

ПРОСЬБЫ

Бога, карону ўсіх святых, з радасцю просім:

Праз заступніцтва святых збаў нас, Пане.

Божа, Ты ў сваёй мудрасці ўстанавіў Апосталаў падмуркам Хрыстовага Касцёла,

– захавай сваіх верных у паслухмянасці іх вучэнню.

Ты адарыў вялікай мужнасцю мучанікаў, якія праліццём сваёй крыві засведчылі пра Цябе,

– учыні, каб хрысціяне былі вернымі сведкамі Тваго Сына.

Ты адарыў святых дзеваў ласкаю наследаваць чыстасць Хрыста,

– учыні, каб яны праз сваё прысвячэнне імкнуліся атрымаць нябесныя даброты.

Ты праз святасць людзей аб’яўляеш нам сваё аблічча і сваё вучэнне,

– дазволь, каб вернікі, ушаноўваючы святых, штораз больш набліжаліся да Цябе.

Адары памерлых прабываннем у вечнай айчыне разам з Паннай Марыяй, святым Юзафам і ўсімі святымі,

– учыні і нас праз іх заступніцтва годнымі гэтых нябесных абяцанняў.

Ойча наш.

МАЛІТВА

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

КАМПЛЕТА

Пасля гэтага пажадана зрабіць рахунак сумлення.

ГІМН

О Хрыстэ, Ты дзень поўны бляску,
Знішчаеш цемру начную.
Ў Табе пачатак святла ёсць,
І дорыш яго Ты абраным.

Таму Цябе вельмі просім:
Абарані нас ад злога,
І адары нас спакоем,
І сілы новыя дай нам.

Калі ўжо сон нас агорне,
Хай сэрца чувае з Табою,
І верных, што Цябе любяць,
Ты захавай сваёй моцай.

Зірні на нас, Божа і Пане,
Зруйнуй усе злыя намеры
І аддалі ўсе спакусы,
Бо нас Ты крывёй сваёй збавіў.

О Хрыстэ, Уладар Наймілейшы,
Цябе, як Айца, так і Духа,
Усё, што пад небам жывое,
Няхай праслаўляе бясконца. Амэн.

ПСАЛЬМОДЫЯ

Ант. Схаваешся пад Ягонымі крыламі, * не будзеш баяцца страху начнога.

Псальм 91 (90)
Пад аховай Найвышэйшага

Вось Я даў вам уладу наступаць на змеяў і скарпіёнаў (Лк 10, 19)

Хто жыве пад аховаю Найвышэйшага *
і знаходзіцца ў цені Усемагутнага,

той скажа Пану: «Ты маё прыстанішча і мая цвярдыня, *
Божа мой, на Цябе спадзяюся».

Ён сам цябе вызваліць з сеткі паляўнічага *
і ад слова, што нясе пагібель.

Пер’ем сваім цябе ахіне, *
і ты схаваешся пад Ягонымі крыламі.

Не будзеш баяцца ні страху начнога, *
ні стралы, што ўдзень ляціць.

Ні заразы, што ходзіць у змроку, *
ні згубы, што знішчае апоўдні.

Тысяча ўпадзе збоку ад цябе, †
і дзесяць тысяч – праваруч цябе, *
але да цябе не наблізяцца.

Толькі паглядзіш вачыма сваімі – *
і ўбачыш адплату грэшнікам.

Бо Пана ты ўчыніў сваім прытулкам, *
Найвышэйшага – сваім жыллём.

Няшчасце не прыйдзе да цябе, *
і гора не наблізіцца да твайго шатра.

Бо анёлам сваім загадае наконт цябе, *
каб яны ахоўвалі цябе на ўсіх шляхах тваіх.

На руках цябе будуць насіць, *
каб не спатыкнуўся ты аб камень сваёй нагою.

Будзеш ступаць па львах і змеях *
і растопчаш ільвяня і цмока.

За тое, што ён палюбіў Мяне, уратую яго; *
абараню яго, бо ён пазнаў Маё імя.

Пакліча Мяне, – і адкажу яму, †
Я буду з ім ва ўціску, *
вызвалю яго і праслаўлю.

Даўжынёю дзён яго насычу *
і пакажу яму сваё збаўленне.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Схаваешся пад Ягонымі крыламі, * не будзеш баяцца страху начнога.

КАРОТКАЕ ЧЫТАННЕ Ап 22, 4-5
І ўбачаць аблічча Пана, і імя Ягонае будзе на іх чолах. І ночы ўжо не будзе, і не будуць мець патрэбы ні ў святле лямпы, ні ў святле сонца, бо Пан Бог будзе свяціць над імі; і яны будуць валадарыць на векі вечныя.

КАРОТКI РЭСПАНСОРЫЙ

К. У рукі Твае, Пане, * аддаю я дух мой.
Н. У рукі Твае, Пане, * аддаю я дух мой.
К. Ты нас адкупіў, Пане Божа верны.
Н. Аддаю я дух мой.
К. Хвала Айцу і Сыну, і Духу Святому.
Н. У рукі Твае, Пане, * аддаю я дух мой.

ПЕСНЯ З ЕВАНГЕЛЛЯ

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

Песня Сімяона (Лк 2, 29-32)
Хрыстус – святло народаў і хвала Ізраэля

Цяпер адпускаеш слугу Твайго, Валадару, *
паводле слова Твайго, у спакоі;

бо вочы мае ўбачылі збаўленне Тваё, *
якое падрыхтаваў Ты перад абліччам усіх народаў,

святло для асвятлення язычнікаў *
і хвалу народу Твайго Ізраэля.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

МАЛІТВА

Просім Цябе, Пане, наведай гэты дом і аддалі ад яго ўсе варожыя подступы. Няхай Твае святыя анёлы апякуюцца ім і захоўваюць нас у спакоі, а Тваё благаслаўленне няхай заўсёды будзе над намі. Праз Хрыста, Пана нашага. Амэн.

Потым, нават тады, калі Камплета чытаецца індывідуальна, прамаўляецца благаслаўленне:

Ноч спакойную і смерць шчаслівую няхай дасць нам Бог усемагутны, Айцец і Сын, і Дух Святы.
Н. Амэн.

АНТЫФОНЫ НА ЗАКАНЧЭННЕ ДА НАЙСВЯЦЕЙШАЙ ПАННЫ МАРЫІ

Дзева, Маці Адкупіцеля,
брама раю нябеснага,
зорка мора й ратунак
для чалавека грэшнага.
Падтрымай люд знясілены,
што імкнецца да святасці,
Ты, што чынам дзівосным
нарадзіла Збавіцеля,
свайго святога Стварыцеля.
Прывітана анёлам, усесвятая Марыя,
барані нас ад грэху і за нас заступіся.

Або:

Вітай, неба Уладарка,
Вітай, Панна анёлаў,
Вітай, Ружа і Брама;
Яснасць свету дала Ты.
Цешся, Панна хвалебная,
Панад усё прыгажэйшая,
Вітай, Маці нябесная;
Заступіся за нас Ты.

Або:

Вітай, Каралева,
Маці міласэрнасці,
жыццё, асалода і надзея наша, вітай!
Да Цябе звяртаемся мы, выгнаннікі, дзеці Евы.
Да Цябе ўздыхаем, стогнучы і плачучы
ў гэтай слёз даліне.
Дык звярні на нас, Заступніца наша,
Твае міласэрныя вочы.
І Езуса, благаславёны плод улоння Твайго,
з’яві нам пасля выгнання гэтага.
О ласкавая, о літасцівая,
о салодкая Панна Марыя.

Або:

Тваёй абароне аддаемся,
Святая Багародзіца,
У нашых патрэбах
Не пагарджай маленнем нашым.
І ад усялякай злой прыгоды
Выбаўляй нас заўсёды,
Панна хвалебная і благаслаўлёная.
О пані наша, Апякунка наша,
Суцяшальніца наша, Ты Заступніца наша,
З Сынам сваім нас паяднай,
Сыну свайму нас даручай,
Сыну свайму с аддавай.

© Канферэнцыя Каталіцкіх Біскупаў у Беларусі
Мінск, 2012 - 2024

Выкарыстанне тэкстаў Літургіі гадзінаў
з мэтаю выдання і перавыдання забаронена

Зваротная сувязь: liturgiaminsk@gmail.com