Заклік з’яўляецца пачаткам штодзённай літургічнай малітвы. Ён папярэднічае Гадзіне чытанняў або Ютрані, у залежнасці ад таго, якая з гэтых літургічных гадзінаў распачынае малітву дня.

К. Пане, адкрый мае вусны.
Н. І вусны мае будуць абвяшчаць Тваю хвалу.

Ант. Хадземце, паклонімся Пану, / Валадару мучанікаў.

Псальм 67 (66)
Няхай усе народы праслаўляюць Пана

Ведайце, што гэта Божае збаўленне паслана да язычнікаў (Дз 28, 28) 

Няхай Бог змілуецца над намі і благаславіць нас, *
няхай заззяе аблічча Яго над намі,

каб на зямлі мы спазналі Ягоную дарогу, *
між усімі народамі Яго збаўленне.

Ант. Хадземце, паклонімся Пану, / Валадару мучанікаў.

Няхай славяць Цябе народы, Божа, *
няхай славяць Цябе народы ўсе.

Няхай весяляцца і радуюцца ўсе плямёны, †
бо Ты судзіш народы паводле праўды *
і плямёнамі на зямлі кіруеш.

Ант. Хадземце, паклонімся Пану, / Валадару мучанікаў.

Няхай славяць Цябе народы, Божа, *
няхай славяць Цябе народы ўсе.

Зямля прынесла свой плён; *
няхай Бог, наш Бог нас благаслаўляе.

Няхай Бог нас благаслаўляе, *
няхай баяцца Яго ўсе межы зямлі.

Ант. Хадземце, паклонімся Пану, / Валадару мучанікаў.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Хадземце, паклонімся Пану, / Валадару мучанікаў.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

О мучанік благаслаўлёны,
Шчаслівы той дзень перамогі,
Калі ўзнагароду за мужнасць
Ад Збаўцы свайго атрымаў ты.

Калі перамог змрок і цемру,
І суддзяў, і лютага ката,
Той дзень для цябе стаў сустрэчай
З адзіным Суддзёю і Панам.

Цяпер ужо радасна ў небе
З анёламі цешышся разам
У шатах прыгожых, каштоўных,
Якія абмыў ты крывёю.

За нас у Хрыста заступіся,
Каб змілаваўся Ён над намі,
Схіліў сваё вуха да просьбаў,
Правіны ласкава прабачыў.

Сыдзі на зямлю хоць на момант,
Прыносячы ласку Хрыстову,
Каб той, хто пад цяжарам грэху,
Адчуў прабачэння палёгку.

Няхай жа гучыць праслаўленне
У Тройцы Адзінаму Богу,
Які на цябе ўскладае
Каштоўны вянок перамогі. Амэн.

ПСАЛЬМОДЫЯ

1 ант. Усе будуць ненавідзець вас за Маё імя; * хто ж вытрывае да канца, будзе збаўлены.

Псальм 2

Чаму бунтуюцца язычнікі *
і народы задумалі марнае?

Паўстаюць каралі зямлі, †
і сыходзяцца разам князі *
супраць Пана і памазаніка Яго:

«Парвём іхнія кайданы і скінем з сябе іхняе ярмо!» †
Той, хто жыве ў нябёсах, пасмяецца, *
Пан будзе насміхацца з іх.

Тады скажа ім у гневе сваім *
і спалохае іх сваёй лютасцю:

«Я намасціў караля Майго на Сіёне, *
на святой гары Маёй!»

Абвяшчу пастанову Пана. †
Ён мне сказаў: «Ты сын Мой, *
Я цябе сёння нарадзіў.

Прасі ў Мяне, і дам народы ў спадчыну табе *
і межы зямлі ва ўладанне тваё.

Ударыш іх жалезным кіем, *
разаб’еш іх як посуд ганчара».

А цяпер, каралі, зразумейце, *
навучыцеся, суддзі зямлі.

З бояззю служыце Пану *
і радуйцеся з хваляваннем.

Трымайцеся вучэння, †
каб Ён не разгневаўся і вы не загінулі ў дарозе, *
бо гнеў Ягоны неўзабаве запалае.

Шчаслівыя ўсе, *
хто на Яго спадзяецца.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Усе будуць ненавідзець вас за Маё імя; * хто ж вытрывае да канца, будзе збаўлены.

2 ант. Цярпенні гэтага веку нягодныя той славы, * якая павінна выявіцца ў нас.

Псальм 11 (10)

Шукаю прытулку ў Пану, †
чаму вы кажаце маёй душы: *
«Пералятай на гару, быццам птушка?

Бо вось бязбожнікі нацягваюць лук, †
кладуць свае стрэлы на цеціву, *
каб упоцемках страляць па праведных сэрцам.

Калі разбураны падмуркі, *
што зробіць справядлівы?»

Пан у святой сваёй святыні, *
трон Пана на нябёсах.

Вочы Ягоныя бачаць, *
павекі Яго назіраюць за сынамі чалавечымі.

Пан выпрабоўвае справядлівага і бязбожнага, *
ненавідзіць душа Яго тых, хто любіць насілле.

Ён спашле на бязбожнікаў гарачыя вуглі, †
агонь, і серу, і вецер пякучы, – *
гэта частка іхняга келіха.

Бо Пан справядлівы і любіць праўду, *
праведнікі ўбачаць Ягонае аблічча.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Цярпенні гэтага веку нягодныя той славы, * якая павінна выявіцца ў нас.

3 ант. Пан выпрабаваў выбраных, як золата ў печы, * і прыняў іх, як ахвяру ўсеспалення.

Псальм 17 (16)

Пачуй, Пане, маю справядлівасць, *
выслухай маю просьбу,

прымі маю малітву *
з непадманлівых вуснаў.

Ад аблічча Твайго няхай выходзіць прысуд мой, *
няхай бачаць вочы Твае праведнасць.

Ты праверыў маё сэрца *
і ноччу мяне наведаў,

выпрабоўваў мяне *
і не знайшоў несправядлівасці ўва мне.

У людскіх справах †
паводле слова вуснаў Тваіх *
я сцярогся ад шляхоў насілля.

Умацуй мае крокі на Тваіх шляхах, *
каб не пахіснуліся мае ногі.

Я клічу Цябе, бо Ты выслухаеш мяне, Божа; *
схілі вуха Тваё да мяне, пачуй мае словы.

Пакажы цуды міласэрнасці сваёй, †
Збаўца, які ратуеш ад ворагаў тых, *
хто спадзяецца на Тваю правіцу.

Сцеражы мяне, як зрэнку вока, *
у цені Тваіх крылаў схавай мяне

ад бязбожнікаў, што мяне ўціскаюць, *
ад ворагаў маіх, што з прагавітасцю мяне абступілі.

Яны замкнулі свае сэрцы тукам, *
дзёрзка гавораць вуснамі сваімі.

Цяпер на кожным кроку яны акружаюць мяне, *
іх вочы глядзяць, як паваліць мяне на зямлю.

Яны падобны да льва, які прагне здабычы, *
да львяня, што ляжыць у патаемных месцах.

Устань, Пане, выйдзі супраць яго і павалі, *
уратуй маё жыццё ад бязбожніка.

Сваёй рукой забі іх, Пане, †
прыбяры іх з гэтага свету з ліку тых, *
каму выпала доля жыцця.

Ты сваімі дабротамі напаўняеш іх жывот, †
і сытыя іхнія сыны, *
а рэшту яны пакідаюць сваім дзецям.

Я ў справядлівасці ўбачу Тваё аблічча, *
калі прачнуся, буду насычацца Тваім абліччам.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Пан выпрабаваў выбраных, як золата ў печы, * і прыняў іх, як ахвяру ўсеспалення.

К. Гора і нядоля напаткалі мяне.
Н. Але я разважаю над наказамі Тваімі.

ПЕРШАЕ ЧЫТАННЕ
Кніга Мудрасці Сіраха 51, 1-17

Падзяка Богу за ўратаванне ад небяспекі

Буду праслаўляць Цябе, Пане, Валадар, і ўзвялічваць Цябе, Бог мой Збаўца.

Буду праслаўляць імя Тваё, бо Ты стаў для мяне абаронай і дапамогай. Ты ўратаваў маё цела ад згубы, ад сеткі падступнага языка і ад вуснаў, што гавораць падман. Перад абліччам маіх праціўнікаў, Ты стаў для мяне дапамогай. Паводле вялікай міласэрнасці Твайго імя Ты вызваліў мяне ад тых, хто рыкаў, каб паглынуць мяне; ад рук тых, хто паляваў на маю душу; ад многіх няшчасцяў, якія мяне напаткалі, ад задушэння ў агні, які мяне абкружыў, і з агня, які не я запаліў; ад глыбіні адхлані; ад языка нячыстага і падманлівага слова – ад паклёпаў падступнага языка супраць караля.

Мая душа наблізілася аж да смерці, а жыццё маё было блізка да адхлані, у падзямеллі. З усіх бакоў абкружылі мяне, і не было каму мяне падтрымаць; я спадзяваўся на дапамогу ад людзей, але яе не было.

Тады я згадаў пра міласэрнасць Тваю, Пане, і пра справы Твае, што былі спрадвеку, як Ты ратуеш тых, хто цярпліва чакае Цябе, і вызваляеш іх ад рук непрыяцеляў. Я ўзняў з зямлі маё маленне і прасіў уцячы ад смерці. Я клікаў Пана: «Ты Айцец мой, не пакідай мяне ў дні нядолі, і ў дні ганарыстых, калі не будзе дапамогі. Я буду няспынна праслаўляць Тваё імя і апяваць яго з удзячнасцю».

І мая просьба была пачута, бо Ты ўратаваў мяне ад згубы і вызваліў ад ліхой пары. Таму буду праслаўляць Цябе, і апяваць Цябе, і благаслаўляць імя Пана.

РЭСПАНСОРЫЙ Сір 51, 2; Пс 31 (30), 8
Н. Буду праслаўляць імя Тваё, * бо Ты стаў для мяне абаронай і дапамогай.
К. Весялюся і радуюся міласэрнасці Тваёй.
Н. Бо Ты стаў для мяне абаронай і дапамогай.

Другое чытанне

Энцыкліка Ecclésiam Dei папы Пія ХІ 

(AAS 15 [1923], 573. 576-577) 

Праліў сваю кроў за адзінства Касцёла

Паводле цудоўнага намеру Бога Касцёл устаноўлены так, каб у поўні часу мог паказаць сябе як вялікая сям’я, што ахоплівае ўсё чалавецтва. Ведаем, што паводле Божай волі вылучаецца ён, акрамя іншых цудоўных рысаў, таксама экуменічнай еднасцю.

Калі Хрыстус Пан сказаў: «Дадзена Мне ўсялякая ўлада на небе і на зямлі. Дык ідзіце і навучайце ўсе народы» (Мц 28, 18-19), не толькі Апосталам даручыў заданне, якое сам атрымаў ад Айца, але таксама пажадаў, каб калегія Апосталаў утварала дасканалую еднасць, каб унутрана была звязана самым моцным падвойным вузлом: той самай верай і той самай любоўю, якая «вылілася ў сэрцы нашыя праз Духа Святога» (пар. Рым 5, 5), а знешне: кіраўніцтвам аднаго над усімі праз даручэнне Пятру першынства сярод Апосталаў, як трывалага прынцыпу і фундаменту еднасці. Каб гэтая еднасць і згода трывала заўсёды, Бог у сваім Провідзе асвяціў яе нібы адначасова пячаткай святасці і мучаніцтва.

Атрымаць такую хвалу быў годны арцыбіскуп Полацка, Язафат, усходняга славянскага абраду, у якім мы бачым цудоўную хвалу і апірышча ўсходніх славянаў. Бо ніхто больш за яго, напэўна, не праславіў іх імя і не прычыніўся да збаўлення тых народаў, як гэты пастыр і апостал, асабліва, калі праліў сваю кроў за еднасць святога Касцёла. Пад уплывам Божага натхнення зразумеў, што найбольш зможа зрабіць для аднаўлення еднасці, калі ў паўсюдным Касцёле захавае ўсходні славянскі абрад і базыліянскую рэгулу манаскага жыцця.

У клопаце найперш аб еднасці сваіх землякоў з пасадам св. Пятра, усюды шукаў магчымасці будавання гэтай еднасці і яе ўмацавання. Асабліва даследаваў літургічныя кнігі, якія, паводле рэкамендацый Айцоў, выкарыстоўваліся на Усходзе, таксама адлучанымі хрысціянамі. Пасля такой стараннай падрыхтоўкі распачаў справу па аднаўленні еднасці. Рабіў гэта з такой моцаю, і адначасова лагоднасцю, і так плённа, што ягоныя ворагі назвалі яго «душахватам».

 

Рэспансорый Ян 17, 11b. 23. 22a

Н. Езус сказаў: Ойча святы, захавай іх у імені Тваім, якое Ты даў Мне, * каб былі з’яднаныя ў адно, каб свет пазнаў, што Ты паслаў Мяне.

К. Славу, якую Ты даў Мне, Я даў ім. Н. Каб былі.

ГІМН

Цябе, Бога, праслаўляем,
Табе, Пане, хвала вечна.

Неба і зямля спявае
Табе, Ойча векавечны.

Табе, Божа, ўсе анёлы,
3 імі Моцы і Нябёсы,

Херубімы, cерафімы
Гімн хвалы адвечны ўзносяць.

Святы, Святы над святымі
Бог магутны і ласкавы,

Над зямлёй і небам слыне
Неабсяжнасць Тваёй славы.

I Апосталы, і вучні,
Хор прарокаў, поўны хвалы,

3 імі мучанікаў лучнасць
Аддаюць Табе пашану.

У сугучным хоры льецца
Па усёй зямлі наўкола

Табе хвала з нашых сэрцаў,
Спеў святы Твайго Касцёла.

Сына з Духам суцяшэння,
Велічы Айца прамністай

Праслаўляе ўсё стварэнне, –
Валадар хвалы Ты, Хрыстэ.

Каб жа выбавіць свет цэлы
Праз свае святыя раны,

Сын Айца спрадвечны, цела
Ты прыняў ва ўлонні Панны.

Зруйнаваў Ты брамы смерці,
На крыжы ёй вырваў джала,

Каб для ўсіх, хто ў Цябе верыць,
Радасць вечная заззяла.

Праваруч Айца, у славе
Трон Твой, Збаўца наш адзіны,

Прыйдзеш зноў адтуль у яве,
Каб судзіць людскія чыны.

Грэшным Ты не дай загінуць, –
Будзь нам Збаўцам, не Суддзёю

I абмый нас ад правінаў
Дарагой сваёй крывёю.

Са святымі, ў бляску моцы
Захавай Тваіх абраных,

Пане, збаў народ Твой, просім,
Благаслаў Тваіх падданых.

Гэтую апошнюю частку гімна можна па жаданні прапусціць.

Шляхам нас вядзі бяспечным
У нябесны Ерузалем.

Цябе, Валадар адвечны,
Мы штодзённа праслаўляем.

Праз вякі гучыць няспынна
Спеў, што славіць Твае справы.

Пане, ад усіх правінаў
Захаваць нас будзь ласкавы.

Не пакінь жа свайго люду,
Божа, без Тваёй апекі.

Пану веру, дык не буду
Асаромлены навекі.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

Потым, прынамсі пры супольнай цэлебрацыі, дадаецца акламацыя:

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пададзенае вышэй прапускаецца, калі гэтая Гадзіна чытаецца непасрэдна пасля Закліку.

ГІМН

Мучанік, ты крочыш следам
Хрыста і адзінага Збаўцы,
Над ворагамі трыумфуеш
І вечнасцю цешышся ў небе.

Ты моцаю, дадзенай Панам,
Абмый нас ад розных правінаў,
Ад зла барані і дазволь нам
З табою жыць назаўсёды.

Ужо развязаліся путы
Твайго праслаўлёнага цела.
Няхай міласць Божага Сына
І з нас зніме грэшныя путы.

Няхай жа гучыць праслаўленне
У Тройцы Адзінаму Богу,
Які на цябе ўскладае
Каштоўны вянок перамогі. Амэн.

ПСАЛЬМОДЫЯ

1 ант. Мае вусны будуць праслаўляць Цябе, Пане, * бо міласэрнасць Твая лепшая за жыццё.

Псальм 63 (62), 2-9
Душа, якая прагне Бога

Той з Богам, хто адкідае ўчынкі цемры

Божа, мой Божа, Цябе шукаю, *
Цябе прагне душа мая.

Маё цела па Табе тужыць *
у зямлі пустыннай, засохлай і бязводнай.

Так, у святыні я ўглядаюся ў Цябе, *
каб убачыць Тваю сілу і славу.

Бо міласэрнасць Твая лепшая за жыццё, *
вусны мае будуць хваліць Цябе.

Так, буду благаслаўляць Цябе ў маім жыцці *
і ўзнясу рукі ў імя Тваё.

Душа мая насычаецца, нібы тлушчам і тукам, *
і вусны мае славяць Цябе радасным спевам;

калі ўзгадваю Цябе на маім ложы, *
разважаю пра Цябе ў начную варту.

Бо Ты стаў маёй дапамогай, *
у цені крылаў Тваіх узрадуюся.

Да Цябе імкнецца душа мая, *
трымае мяне Твая правіца.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Мае вусны будуць праслаўляць Цябе, Пане, * бо міласэрнасць Твая лепшая за жыццё.

2 ант. Мучанікі Пана, * благаслаўляйце Пана навекі.

Песня (Дан 3, 57-88. 56)
Кожнае стварэнне хваліць Пана

Хваліце Бога нашага, усе Ягоныя слугі (Ап 19, 5)

Благаслаўляйце Пана, усе стварэнні Ягоныя, *
хваліце і ўзвялічвайце Яго навекі.

Нябёсы, благаслаўляйце Пана, *
благаслаўляйце Пана, анёлы Ягоныя.

Благаслаўляйце Пана, усе воды, што пад небам, *
няхай усялякая моц благаслаўляе Пана.

Благаслаўляйце Пана, сонца і месяц, *
благаслаўляйце Пана, нябесныя зоркі.

Благаслаўляйце Пана, усе дажджы і росы, *
благаслаўляйце Пана, усе вятры.

Благаслаўляйце Пана, агонь і спёка, *
благаслаўляйце Пана, холад і гарачыня.

Благаслаўляйце Пана, росы ды іней, *
благаслаўляйце Пана, мароз і холад.

Благаслаўляйце Пана, лёд і снег, *
благаслаўляйце Пана, дні і ночы.

Благаслаўляйце Пана, святло і цемра, *
благаслаўляйце Пана, маланкі і хмары.

Няхай зямля благаслаўляе Пана, *
няхай хваліць Яго і ўзвялічвае навекі.

Благаслаўляйце Пана, горы і ўзгоркі, *
благаслаўляйце Пана, усе расліны зямлі.

Благаслаўляйце Пана, крыніцы, *
благаслаўляйце Пана, моры і рэкі.

Благаслаўляйце Пана, кіты і ўсё, што плавае ў водах, *
благаслаўляйце Пана, усе нябесныя птушкі.

Благаслаўляйце Пана, усе звяры і жывёлы, *
благаслаўляйце Пана, чалавечыя сыны.

Няхай Ізраэль благаслаўляе Пана, *
хваліць і ўзвялічвае Яго навекі.

Благаслаўляйце Пана, святары Ягоныя, *
благаслаўляйце Пана, слугі Ягоныя.

Благаслаўляйце Пана, духі і душы справядлівых, *
благаслаўляйце Пана, святыя і пакорныя сэрцам.

Благаслаўляйце Пана, Ананія, Азарыя, Місаэль, *
хваліце і ўзвялічвайце Яго навекі.

Благаславім Айца і Сына, і Духа Святога, *
будзем хваліць і ўзвялічваць Яго навекі.

Благаслаўлёны Ты на скляпенні неба, *
годны хвалы і ўзвялічаны навекі.

2 ант. Мучанікі Пана, * благаслаўляйце Пана навекі.

3 ант. Хто пераможа, * таго зраблю калонай у Маёй святыні, – / кажа Пан.

Псальм 149
Радасць святых

Дзеці Касцёла, дзеці новага народу радуюцца свайму Валадару – Хрысту (Хезыхій)

Спявайце Пану новую песню, *
хвала Яму на сходзе святых.

Няхай радуецца Ізраэль у тым, хто яго стварыў, *
сыны Сіёна няхай цешацца ў сваім Валадары.

Няхай праслаўляюць імя Ягонае ў танцы, *
няхай зайграюць Яму на бубне і арфе.

Бо Пан любіць свой народ, *
пакорных карануе збаўленнем.

Няхай усклікаюць святыя ў славе, *
няхай радуюцца на ложах сваіх.

Пахвала Богу на іх вуснах, *
а двухбаковы меч – у іхніх руках,

каб адпомсціць язычнікам *
і пакараць народы;

каб звязаць ланцугамі іх каралёў, *
а вяльможаў іх скаваць у жалезныя кайданы,

каб здзейсніць над імі запісаны прысуд: *
такая хвала для ўсіх Ягоных святых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Хто пераможа, * таго зраблю калонай у Маёй святыні, – / кажа Пан.

КАРОТКАЕ ЧЫТАННЕ 2 Кар 1, 3-5
Благаслаўлёны Бог і Айцец Пана нашага Езуса Хрыста, Айцец міласэрнасці і Бог усякага суцяшэння, які суцяшае нас ва ўсякім смутку нашым, каб мы маглі суцяшаць усіх засмучаных тым суцяшэннем, якім Бог суцяшае нас саміх. Бо, як памнажаюцца ў нас цярпенні Хрыстовы, так памнажаецца праз Хрыста і суцяшэнне нашае.

КАРОТКІ РЭСПАНСОРЫЙ
К. Моц мая * і мая хвала – Пан.
Н. Моц мая * і мая хвала – Пан.
К. Ён маё збаўленне.
Н. І мая хвала – Пан.
К. Хвала Айцу і Сыну, і Духу Святому.
Н. Моц мая * і мая хвала – Пан.

ПЕСНЯ З ЕВАНГЕЛЛЯ

Ант. да песні Захарыі: Хто ненавідзіць жыццё сваё на гэтым свеце, * захавае яго для вечнага жыцця.

Песня Захарыі (Лк 1, 68-79)
Месія і Яго папярэднік

Благаслаўлёны Пан, Бог Ізраэля, *
бо наведаў і адкупіў народ свой,

і ўзняў моц збаўлення для нас *
у доме Давіда, слугі свайго.

Як абвясціў спрадвеку *
вуснамі сваіх святых прарокаў,

што збавіць нас ад ворагаў нашых *
і ад рук усіх, хто нас ненавідзіць.

Каб праявіць міласэрнасць да айцоў нашых *
і нагадаць пра святы запавет свой.

Прысягу, якую даў Абрагаму, айцу нашаму, *
дасць нам.

Каб, выбаўленыя з рук ворагаў, *
мы без страху служылі Яму

ў святасці і справядлівасці перад Ім *
ва ўсе дні нашыя.

А ты, дзіцятка, прарокам Найвышэйшага будзеш названа, *
бо пойдзеш прад абліччам Пана падрыхтаваць шляхі Яму,

каб даць народу Ягонаму пазнаць збаўленне *
праз адпушчэнне яго грахоў,

дзякуючы сардэчнай міласэрнасці нашага Бога,*
у якой наведаў нас Усход з вышыні;

каб асвятліць тых, *
хто сядзіць у цемры і ў цені смяротным;

каб накіраваць ногі нашыя *
на шлях спакою.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Захарыі: Хто ненавідзіць жыццё сваё на гэтым свеце, * захавае яго для вечнага жыцця.

ПРОСЬБЫ

Праз мучанікаў, якія аддалі жыццё за Божае слова, праславім Хрыста, нашага Збаўцу і вернага Сведку:
Ты адкупіў нас для Бога сваёй крывёю.

Пане, праз Тваіх мучанікаў, якія добраахвотна прынялі смерць, каб даць сведчанне веры,
– дай нам сапраўдную свабоду духу.

Пане, праз Тваіх мучанікаў, якія вызнавалі веру аж да праліцця сваёй крыві,
– дай нам чысціню і сталасць веры.

Пане, праз Тваіх мучанікаў, якія, прыняўшы крыж, пайшлі за Табою,
– дай нам мужна зносіць жыццёвыя выпрабаванні.

Пане, праз Тваіх мучанікаў, якія абмылі свае шаты ў крыві Баранка,
– дай нам перамагчы ўсе спакусы цела і свету.

Ойча наш.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Трываючы ў малітве і чуванні,
калі настане трэцяя гадзіна,
з пабожным сэрцам будзем праслаўляць
славу і моц Святой Адзінай Тройцы.

Каб сталі мы жыллём Святога Духа,
які калісьці ў гэтую гадзіну
спасланы быў Апосталам з нябёсаў
як дар вялікай міласці Хрыстовай.

Той, хто стварыў нябёсаў валадарства,
цудоўным чынам свет наш упрыгожыў,
уліў у сэрцы радасць, суцяшэнне,
аздобіў усё для вечнай узнагароды.

Няхай Табе, о Хрыстэ наймілейшы
І Валадару кожнага стварэння,
Разам з Айцом і Духам суцяшэння
Хвала гучыць усюды і навекі. Амэн.

ПСАЛЬМОДЫЯ

Ант. Пан даў мучанікам перамогу ў змаганні, * каб ведалі, што любоў мацнейшая за ўсё.

Псальм 119 (118), 153-160
XХ (Рэш)

Паглядзі на нядолю маю і выбаві мяне, *
бо я не забыў пра Твой закон.

Рассудзі маю справу і збаў мяне, *
ажыві мяне паводле Твайго слова.

Далёка ад грэшнікаў выратаванне, *
бо яны не шукаюць Тваіх пастановаў.

Вялікая Твая міласэрнасць, Пане, *
паводле наказаў сваіх ажыві мяне.

Шмат хто пераследуе мяне і ўціскае, *
але я не адхіляюся ад Тваіх сведчанняў.

Бачыў здраднікаў я і адчуваў агіду, *
бо не захоўваюць яны Твайго слова.

Глядзі, як я палюбіў Твае наказы; *
Пане, ажыві мяне паводле міласэрнасці сваёй.

Падстава слова Твайго – праўда, *
і вечныя ўсе суды справядлівасці Тваёй.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 128 (127)
Божае благаслаўленне дому

«Няхай благаславіць цябе Пан з Сіёна», гэта значыць з Касцёла свайго (Арнобій)

Шчаслівы кожны, хто баіцца Пана, *
хто ходзіць Ягонымі шляхамі.

Плён працы рук сваіх будзеш спажываць, *
будзеш шчаслівы і добра табе будзе.

Жонка твая, як урадлівая вінаградная лаза *
ў сценах дому твайго.

Сыны твае, як аліўкавыя парасткі, *
вакол стала твайго.

Вось так будзе благаслаўлёны чалавек, *
які баіцца Пана.

Няхай благаславіць цябе Пан з Сіёна, – †
і ты ўбачыш дабрабыт Ерузалема *
ва ўсе дні жыцця свайго.

Убачыш патомства сыноў сваіх. *
Спакой над Ізраэлем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 129 (128)
Новая надзея прыгнечанага народу

Касцёл гаворыць пра свае цярпенні (св. Аўгустын)

Часта прыгняталі мяне з маладосці маёй, – *
можа сказаць Ізраэль, –

часта ўціскалі мяне з маладосці маёй, *
аднак не здолелі знішчыць мяне.

На спіне маёй аратыя аралі, *
парабілі доўгія барозны.

Але справядлівы Пан *
паразрываў путы грэшнікаў.

Няхай будуць асаромленыя і адступяць *
усе, хто ненавідзіць Сіён.

Няхай стануць падобнымі да травы на даху, *
якая высыхае перад тым, як яе вырвуць.

Касец не напоўніць ёй сваёй далоні, *
і той, хто вяжа снапы, сваёй рукі.

І не скажуць праходзячыя міма: †
«Благаслаўленне Пана над вамі, *
благаслаўляем вас імем Пана».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пан даў мучанікам перамогу ў змаганні, * каб ведалі, што любоў мацнейшая за ўсё.

КАРОТКАЕ ЧЫТАННЕ 1 П 5, 10-11
Бог усялякай ласкі, які паклікаў вас да сваёй вечнай славы ў Хрысце Езусе, пасля таго як крыху пацерпіце, сам удасканаліць, загартуе, умацуе і зробіць вас непахіснымі. Яго панаванне на векі. Амэн.

К. Пан апрануў яго (яе) ў шаты радасці.
Н. І цудоўную карону ўсклаў на яго (яе) галаву.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Ужо настала шостая гадзіна,
якая заклікае шчырым духам
аддаць хвалу і пакланенне Пану,
Малітвамі Стварыцеля праславіць.

Бо вернікам у гэтую гадзіну.
адкрыўся шлях праўдзівага збаўлення:
ахвяра бласлаўлёнага Баранка
і моц крыжа Ягонага заззяла.

Святло Яго – яснейшае за поўдзень.
Ён ласку сее, нібы промні сонца.
Удзячныя за наша адкупленне,
мы прымем дар Яго ў нашы сэрцы.

Няхай Табе, о Хрыстэ наймілейшы
І Валадару кожнага стварэння,
Разам з Айцом і Духам суцяшэння
Хвала гучыць усюды і навекі. Амэн.

ПСАЛЬМОДЫЯ

Ант. Пан укаранаваў яго (яе) вянком справядлівасці * і даў яму (ёй) святое імя, поўнае славы.

Псальм 119 (118), 153-160
XХ (Рэш)

Паглядзі на нядолю маю і выбаві мяне, *
бо я не забыў пра Твой закон.

Рассудзі маю справу і збаў мяне, *
ажыві мяне паводле Твайго слова.

Далёка ад грэшнікаў выратаванне, *
бо яны не шукаюць Тваіх пастановаў.

Вялікая Твая міласэрнасць, Пане, *
паводле наказаў сваіх ажыві мяне.

Шмат хто пераследуе мяне і ўціскае, *
але я не адхіляюся ад Тваіх сведчанняў.

Бачыў здраднікаў я і адчуваў агіду, *
бо не захоўваюць яны Твайго слова.

Глядзі, як я палюбіў Твае наказы; *
Пане, ажыві мяне паводле міласэрнасці сваёй.

Падстава слова Твайго – праўда, *
і вечныя ўсе суды справядлівасці Тваёй.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 128 (127)
Божае благаслаўленне дому

«Няхай благаславіць цябе Пан з Сіёна», гэта значыць з Касцёла свайго (Арнобій)

Шчаслівы кожны, хто баіцца Пана, *
хто ходзіць Ягонымі шляхамі.

Плён працы рук сваіх будзеш спажываць, *
будзеш шчаслівы і добра табе будзе.

Жонка твая, як урадлівая вінаградная лаза *
ў сценах дому твайго.

Сыны твае, як аліўкавыя парасткі, *
вакол стала твайго.

Вось так будзе благаслаўлёны чалавек, *
які баіцца Пана.

Няхай благаславіць цябе Пан з Сіёна, – †
і ты ўбачыш дабрабыт Ерузалема *
ва ўсе дні жыцця свайго.

Убачыш патомства сыноў сваіх. *
Спакой над Ізраэлем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 129 (128)
Новая надзея прыгнечанага народу

Касцёл гаворыць пра свае цярпенні (св. Аўгустын)

Часта прыгняталі мяне з маладосці маёй, – *
можа сказаць Ізраэль, –

часта ўціскалі мяне з маладосці маёй, *
аднак не здолелі знішчыць мяне.

На спіне маёй аратыя аралі, *
парабілі доўгія барозны.

Але справядлівы Пан *
паразрываў путы грэшнікаў.

Няхай будуць асаромленыя і адступяць *
усе, хто ненавідзіць Сіён.

Няхай стануць падобнымі да травы на даху, *
якая высыхае перад тым, як яе вырвуць.

Касец не напоўніць ёй сваёй далоні, *
і той, хто вяжа снапы, сваёй рукі.

І не скажуць праходзячыя міма: †
«Благаслаўленне Пана над вамі, *
благаслаўляем вас імем Пана».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Пан укаранаваў яго (яе) вянком справядлівасці * і даў яму (ёй) святое імя, поўнае славы.

КАРОТКАЕ ЧЫТАННЕ Як 1, 12
Шчаслівы чалавек, які вытрымлівае выпрабаванне, бо, калі будзе выпрабаваны, атрымае вянец жыцця, які Бог абяцаў тым, хто любіць Яго.

К. Я спадзяюся на Бога.
Н. І не баюся, бо што мне зробіць чалавек.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Мінае ўжо дзевятая гадзіна,
таму з пакораю спявайма Пану.
З адданаю душою, шчырым сэрцам
праславім Бога ў Найсвяцейшай Тройцы.

Прымаючы святую таямніцу,
яе ў чыстым сэрцы захаваем.
Яе адкрыў для ўсіх Пётр у святыні
праз цуды – знак збаўлення нам ад Пана.

Таму далучым розум свой і волю
да сведчання і да вучэння
Апосталаў, што ў імя Хрыстова
вядуць нас Яго моцай да збаўлення.

Няхай Табе, о Хрыстэ наймілейшы
І Валадару кожнага стварэння,
Разам з Айцом і Духам суцяшэння
Хвала гучыць усюды і навекі. Амэн.

ПСАЛЬМОДЫЯ

Ант. Ішлі і плакалі, * несучы насенне, каб сеяць.

Псальм 119 (118), 153-160
XХ (Рэш)

Паглядзі на нядолю маю і выбаві мяне, *
бо я не забыў пра Твой закон.

Рассудзі маю справу і збаў мяне, *
ажыві мяне паводле Твайго слова.

Далёка ад грэшнікаў выратаванне, *
бо яны не шукаюць Тваіх пастановаў.

Вялікая Твая міласэрнасць, Пане, *
паводле наказаў сваіх ажыві мяне.

Шмат хто пераследуе мяне і ўціскае, *
але я не адхіляюся ад Тваіх сведчанняў.

Бачыў здраднікаў я і адчуваў агіду, *
бо не захоўваюць яны Твайго слова.

Глядзі, як я палюбіў Твае наказы; *
Пане, ажыві мяне паводле міласэрнасці сваёй.

Падстава слова Твайго – праўда, *
і вечныя ўсе суды справядлівасці Тваёй.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 128 (127)
Божае благаслаўленне дому

«Няхай благаславіць цябе Пан з Сіёна», гэта значыць з Касцёла свайго (Арнобій)

Шчаслівы кожны, хто баіцца Пана, *
хто ходзіць Ягонымі шляхамі.

Плён працы рук сваіх будзеш спажываць, *
будзеш шчаслівы і добра табе будзе.

Жонка твая, як урадлівая вінаградная лаза *
ў сценах дому твайго.

Сыны твае, як аліўкавыя парасткі, *
вакол стала твайго.

Вось так будзе благаслаўлёны чалавек, *
які баіцца Пана.

Няхай благаславіць цябе Пан з Сіёна, – †
і ты ўбачыш дабрабыт Ерузалема *
ва ўсе дні жыцця свайго.

Убачыш патомства сыноў сваіх. *
Спакой над Ізраэлем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Псальм 129 (128)
Новая надзея прыгнечанага народу

Касцёл гаворыць пра свае цярпенні (св. Аўгустын)

Часта прыгняталі мяне з маладосці маёй, – *
можа сказаць Ізраэль, –

часта ўціскалі мяне з маладосці маёй, *
аднак не здолелі знішчыць мяне.

На спіне маёй аратыя аралі, *
парабілі доўгія барозны.

Але справядлівы Пан *
паразрываў путы грэшнікаў.

Няхай будуць асаромленыя і адступяць *
усе, хто ненавідзіць Сіён.

Няхай стануць падобнымі да травы на даху, *
якая высыхае перад тым, як яе вырвуць.

Касец не напоўніць ёй сваёй далоні, *
і той, хто вяжа снапы, сваёй рукі.

І не скажуць праходзячыя міма: †
«Благаслаўленне Пана над вамі, *
благаслаўляем вас імем Пана».

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Ішлі і плакалі, * несучы насенне, каб сеяць.

Кароткае чытанне Мдр 3, 1-2а. 3b
Душы справядлівых у руках Бога, і не дакранецца да іх ніякая пакута. У вачах неразумных здавалася, што яны памерлі, а яны спачываюць у спакоі.

К. Вернуцца з радасцю.
Н. Несучы снапы свае.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

К. Благаславім Пана.
Н. Дзякуем Пану Богу.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

ГІМН

Божа, вянок перамогі,
Шчасце нязломных жаўнераў,
Віны даруй тым, хто сёння
Мучаніка праслаўляе.

Вуснамі вызнаў мужна
Тое, ў што верыў сэрцам,
І за Настаўнікам следам
Мужна прыняў ён цярпенні.

Радасцяў свету адрокся,
Марнай раскошай пагардзіў,
І, за Хрыста кроў праліўшы,
Ён атрымаў дар збаўлення.

Мужна прайшоў праз пакуты,
Сэрцам нязломным прыняў іх,
Дзеля Цябе ўсё сцярпеўшы,
Ён мае вечную радасць.

Гэтай пакорнай малітвай
Просім Цябе, Наймілейшы,
Каб за заслугі святога
Ты адпусціў нам правіны.

Каб мы дары атрымалі
Тыя, што мучанік мае,
І разам з ім прабывалі
Ў вечнай супольнасці ў небе.

Гонар, пашана і слава,
Ойча, Табе няхай будзе,
Сыну і Духу Святому:
Тройцы Адзінай і Вечнай. Амэн.

ПСАЛЬМОДЫЯ

1 ант. Калі хто хоча пайсці за Мною, * няхай адрачэцца ад сябе, / возьме крыж свой / і ідзе за Мною.

Псальм 116, 1-9 (114)

Люблю я Пана, бо Ён пачуў *
голас маіх малітваў.

Бо Ён схіліў вуха сваё да мяне *
ў дзень, калі я клікаў.

Акружылі мяне путы смерці, †
пакуты пякельныя знайшлі мяне; *
знайшоў я няшчасце і ўціск.

Але я паклікаў імя Пана: *
«Пане, выратуй душу маю».

Пан ласкавы і справядлівы, *
наш Бог міласэрны.

Ахоўвае Пан прастадушных: *
я знемагаў, – і Ён уратаваў мяне.

Вярніся, мая душа, да свайго адпачынку, *
бо Пан добра табе ўчыніў.

Бо Ён вырваў душу маю ад смерці, *
вочы – ад слёз, ногі – ад падзення.

Буду хадзіць перад абліччам Пана *
на зямлі жывых.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

1 ант. Калі хто хоча пайсці за Мною, * няхай адрачэцца ад сябе, / возьме крыж свой / і ідзе за Мною.

2 ант. Калі хто служыць Мне, * таго ўшануе Айцец Мой.

Псальм 116, 10-19 (115)

Я верыў нават тады, калі казаў: *
«Я моцна прыгнечаны».

Я сказаў у боязі сваёй: *
«Кожны чалавек – ілгун».

Чым аддзячу я Пану *
за ўсе Яго дабрадзействы для мяне?

Келіх збаўлення ўзніму *
і буду заклікаць імя Пана.

Выканаю свае абяцанні для Пана *
перад усім Яго народам.

Каштоўная ў вачах Пана *
смерць Яго святых.

Пане, я Твой слуга, †
Я слуга Твой, сын слугі Тваёй, *
Ты разарваў мае кайданы.

Я прынясу Табе ахвяру хвалы *
і буду заклікаць імя Пана.

Выканаю свае абяцанні для Пана *
перад усім Яго народам.

У дварах дома Пана, *
сярод цябе, Ерузалем.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

2 ант. Калі хто служыць Мне, * таго ўшануе Айцец Мой.

3 ант. Хто страціў жыццё сваё дзеля Мяне, * знойдзе яго ў вечнасці.

Песня (Ап 4, 11; 5, 9. 10. 12)

Ты, Пане і наш Божа, *
годны прыняць славу і пашану, і сілу,

бо Ты стварыў усё, *
і з Тваёй волі існавала і было створана.

Ты годны ўзяць кнігу *
і зняць з яе пячаткі,

бо Ты быў забіты †
і сваёй крывёю Ты адкупіў нас для Бога *
з кожнага роду, і мовы, і племені, і народу,

і зрабіў нас валадарствам і святарамі для Бога нашага, *
і мы будзем валадарыць на зямлі.

Забіты Баранак †
годны прыняць моц, і багацце, і мудрасць, *
і сілу, і пашану, і хвалу, і благаслаўленне.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

3 ант. Хто страціў жыццё сваё дзеля Мяне, * знойдзе яго ў вечнасці.

КАРОТКАЕ ЧЫТАННЕ 1 П 4, 13-14
Умілаваныя, паколькі вы прымаеце ўдзел у муках Хрыстовых, радуйцеся, каб і ў час аб’яўлення славы Яго вы ўсцешыліся і ўзрадаваліся. Калі ганяць вас за імя Хрыста, то вы шчаслівыя, бо Дух славы і Дух Божы спачывае на вас.

КАРОТКІ РЭСПАНСОРЫЙ
К. Божа, Ты выпрабаваў нас * і вывеў нас на свабоду.
Н. Божа, Ты выпрабаваў нас * і вывеў нас на свабоду.
К. Ты выпрабаваў нас агнём, як выпрабоўваюць срэбра.
Н. І вывеў нас на свабоду.
К. Хвала Айцу і Сыну, і Духу Святому.
Н. Божа, Ты выпрабаваў нас * і вывеў нас на свабоду.

ПЕСНЯ З ЕВАНГЕЛЛЯ

Ант. да песні Марыі: Жыллё святых – у Нябесным Валадарстве, * і ў вечнасці – адпачынак іхні.

Песня Марыі (Лк 1, 46-55)
Радасць душы ў Пану

Велічае душа мая Пана, *
і ўзрадаваўся дух мой у Богу, маім Збаўцу,

бо глянуў Бог на пакору сваёй слугі. *
І цяпер благаслаўляць мяне будуць усе пакаленні.

Бо вялікае ўчыніў мне Усемагутны, *
а імя Яго святое.

І міласэрнасць Яго з пакалення ў пакаленне *
над тымі, хто Яго баіцца.

Паказаў моц сваёй правіцы, *
рассеяў тых, хто пыхлівы сэрцам.

Скінуў магутных з трону *
і ўзвысіў пакорных.

Дабром галодных насыціў, *
а багатых ні з чым адправіў.

Прыняў свайго слугу Ізраэля, *
памятаючы пра сваю міласэрнасць,

як абяцаў бацькам нашым - *
Абрагаму і яго патомству навекі.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. да песні Марыі: Жыллё святых – у Нябесным Валадарстве, * і ў вечнасці – адпачынак іхні.

ПРОСЬБЫ

Згадваючы гадзіну, калі Валадар мучанікаў ахвяраваў сваё жыццё на Апошняй Вячэры і аддаў яго на крыжы, дзякуем Яму, кажучы:
Цябе, Пане, праслаўляем.

Цябе, Пане, праслаўляем, бо Ты палюбіў нас да канца, наш Збаўца, крыніца і ўзор усякага збаўлення.
Цябе, Пане, праслаўляем.

Ты ўсіх грэшнікаў, якія раскаяліся, паклікаў да жыцця.
Цябе, Пане, праслаўляем.

Ты праліў сваю кроў новага і вечнага запавету дзеля адпушчэння грахоў і загадаў Касцёлу прыносіць яе ў ахвяру Айцу.
Цябе, Пане, праслаўляем.

Ты даў нам ласку дажыць да гэтага дня.
Цябе, Пане, праслаўляем.

Ты сёння далучыў многіх нашых братоў да таямніцы сваёй смерці.
Цябе, Пане, праслаўляем.

Ойча наш.

МАЛІТВА

Божа, Ойча ўсіх вернікаў, спашлі Твайму Касцёлу Духа любові, які даў святому біскупу Язафату сілы ахвяраваць жыццё за сваю паству, праз яго заступніцтва ўмацуй і нас гэтым жа Духам, каб мы без ваганняў маглі аддаць жыццё за бліжніх. Праз Пана нашага.

Потым, калі прысутнічае святар або дыякан, ён рассылае народ, кажучы:

Пан з вамі.
Н. І з духам тваім.
Няхай благаславіць вас Бог усемагутны, Айцец і Сын, і Дух Святы.
Н. Амэн.

Калі адбываецца рассыланне народу, дадаецца заклік:

Ідзіце ў супакоі Хрыста.
Н. Дзякуем Пану Богу.

Калі святар або дыякан адсутнічаюць ці калі Гадзіна чытаецца індывідуальна, то яна завяршаецца наступным чынам:

Няхай Пан благаславіць нас, абароніць ад усялякага зла і давядзе да жыцця вечнага.
Н. Амэн.

К. Божа, прыйдзі мне на дапамогу.
Н. Пане, паспяшы да мяне на паратунак.
Хвала Айцу і Сыну, і Духу Святому.
Як была спрадвеку, цяпер і заўсёды,
І на векі вечныя. Амэн. Аллелюя.

Пасля гэтага пажадана зрабіць рахунак сумлення.

ГІМН

О Хрыстэ, Ты дзень поўны бляску,
Знішчаеш цемру начную.
Ў Табе пачатак святла ёсць,
І дорыш яго Ты абраным.

Таму Цябе вельмі просім:
Абарані нас ад злога,
І адары нас спакоем,
І сілы новыя дай нам.

Калі ўжо сон нас агорне,
Хай сэрца чувае з Табою,
І верных, што Цябе любяць,
Ты захавай сваёй моцай.

Зірні на нас, Божа і Пане,
Зруйнуй усе злыя намеры
І аддалі ўсе спакусы,
Бо нас Ты крывёй сваёй збавіў.

О Хрыстэ, Уладар Наймілейшы,
Цябе, як Айца, так і Духа,
Усё, што пад небам жывое,
Няхай праслаўляе бясконца. Амэн.

ПСАЛЬМОДЫЯ

Ант. Цела маё * будзе спачываць бяспечна.

Псальм 16 (15)
Пан – частка спадчыны маёй

Бог уваскрасіў Езуса, вызваліўшы ад мукаў смерці (Дз 2, 24)

Захавай мяне, Божа, *
бо на Цябе спадзяюся.

Сказаў я Пану: «Ты – мой Пан. *
Няма ў мяне ніякага дабра, апроч Цябе».

Уся мая любоў скіравана да святых, *
выбітных мужоў Яго зямлі.

Тыя, хто ідзе за чужымі багамі, *
памнажаюць свае цярпенні.

Я не буду ліць іхніх крывавых ахвяраў, *
іх імёнаў не вымавяць мае вусны.

Пан – частка спадчыны маёй і келіха майго, *
Ён лёс мой трымае.

Шнуры адмерылі мне шчодры надзел, *
і мая спадчына мне вельмі даспадобы.

Благаслаўляю Пана, які дае мне параду, *
бо і ноччу вучыць мяне маё сэрца.

Пана маю заўсёды перад вачыма, *
Ён праваруч мяне, – і я не пахіснуся.

Таму радуецца маё сэрца і весяліцца душа, *
і цела маё будзе спачываць бяспечна,

бо не пакінеш душы маёй у адхлані *
і не дасі святому Твайму ўбачыць тленне.

Ты дарогу жыцця мне пакажаш, †
паўната радасці перад Табою, *
вечнае шчасце праваруч Цябе.

Хвала Айцу і Сыну, *
і Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Цела маё * будзе спачываць бяспечна.

КАРОТКАЕ ЧЫТАННЕ 1 Тэс 5, 23
Сам жа Бог спакою няхай асвяціць вас цалкам, і ўвесь дух ваш, і душа, і цела няхай захаваюцца без заганы ў прыйсце Пана нашага Езуса Хрыста.

К. У рукі Твае, Пане, * аддаю я дух мой.
Н. У рукі Твае, Пане, * аддаю я дух мой.
К. Ты нас адкупіў, Пане Божа верны.
Н. Аддаю я дух мой.
К. Хвала Айцу і Сыну, і Духу Святому.
Н. У рукі Твае, Пане, * аддаю я дух мой.

ПЕСНЯ З ЕВАНГЕЛЛЯ

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

Песня Сімяона (Лк 2, 29-32)
Хрыстус – святло народаў і хвала Ізраэля

Цяпер адпускаеш слугу Твайго, Валадару, *
паводле слова Твайго, у спакоі;

бо вочы мае ўбачылі збаўленне Тваё, *
якое падрыхтаваў Ты перад абліччам усіх народаў, 

святло для асвятлення язычнікаў *
і хвалу народу Твайго Ізраэля.

Хвала Айцу і Сыну, *
І Духу Святому.

Як была спрадвеку, цяпер і заўсёды, *
і на векі вечныя. Амэн.

Ант. Захавай нас, Пане, калі чуваем, * сцеражы падчас сну, / каб мы чувалі з Хрыстом / і адпачывалі ў супакоі.

МАЛІТВА

Пане наш Божа, атулі нас, змучаных працай гэтага дня, спакойным сном, каб узмоцненыя Тваёй ласкай, мы заўсёды былі адданыя Табе целам і духам. Праз Хрыста, Пана нашага. Амэн.

Потым, нават тады, калі Камплета чытаецца індывідуальна, прамаўляецца благаслаўленне:

Ноч спакойную і смерць шчаслівую няхай дасць нам Бог усемагутны, Айцец і Сын, і Дух Святы.
Н. Амэн.

АНТЫФОНЫ НА ЗАКАНЧЭННЕ ДА НАЙСВЯЦЕЙШАЙ ПАННЫ МАРЫІ

Дзева, Маці Адкупіцеля,
брама раю нябеснага,
зорка мора й ратунак
для чалавека грэшнага.
Падтрымай люд знясілены,
што імкнецца да святасці,
Ты, што чынам дзівосным
нарадзіла Збавіцеля,
свайго святога Стварыцеля.
Прывітана анёлам, усесвятая Марыя,
барані нас ад грэху і за нас заступіся.

Або:

Вітай, неба Уладарка,
Вітай, Панна анёлаў,
Вітай, Ружа і Брама;
Яснасць свету дала Ты.
Цешся, Панна хвалебная,
Па­над усё прыгажэйшая,
Вітай, Маці нябесная;
Заступіся за нас Ты.

Або:

Вітай, Каралева,
Маці міласэрнасці,
жыццё, асалода і надзея наша, вітай!
Да Цябе звяртаемся мы, выгнаннікі, дзеці Евы.
Да Цябе ўздыхаем, стогнучы і плачучы
ў гэтай слёз даліне.
Дык звярні на нас, Заступніца наша,
Твае міласэрныя вочы.
І Езуса, благаславёны плод улоння Твайго,
з’яві нам пасля выгнання гэтага.
О ласкавая, о літасцівая,
о салодкая Панна Марыя.

Або:

Тваёй абароне аддаемся,
Святая Багародзіца,
У нашых патрэбах
Не пагарджай маленнем нашым.
І ад усялякай злой прыгоды
Выбаўляй нас заўсёды,
Панна хвалебная і благаслаўлёная.
О пані наша, Апякунка наша,
Суцяшальніца наша, Ты Заступніца наша,
З Сынам сваім нас паяднай,
Сыну свайму нас даручай,
Сыну свайму с аддавай.